УИХ-ын гишүүн Х.Ганхуяг Аялал жуулчлалын тухай хуулийн төслийн талаар МАН-ын бүлгийн хуралдаанд танилцуулжээ.

Энэ талаар тэрбээр "Аялал жуулчлалын ерөнхий төлөвлөгөө гаргадаг болно. Хэчнээн сая жуулчин татах, түүнтэйгээ уялдуулан нисэх онгоцны буудлыг хөгжүүлэх, зам зуурын амрах цэгүүдийг бий болгох, аялал жуулчлалын бүсүүд хаана байхыг ерөнхий төлөвлөгөөнд тусгаж, үндэсний хороогоор батлуулдаг байх өөрчлөлт хуулийн төсөлд орж байгаа.

Гадаадын жуулчид худалдан авсан барааныхаа НӨАТ-ын буцаалтыг авах боломжийг хуулиар бүрдүүлж өгнө. Мөн дотоодын нислэгийн НӨАТ-ыг тэглэх асуудлыг хуулийн төсөлд тусгасан. Дотоодын нислэгт зарцуулагдаж буй түлш, сэлбэгийг НӨАТ-аас чөлөөлөх боломж бүрдсэнээр нислэг хямдрах юм. Жуулчны аюулгүй байдлыг хуулиар хамгаалах асуудал хуульд орж байгаа. Дотоодын иргэн ч бай гадаадынх ч бай хураамж нь адилхан байна" гэдгийг хэлсэн юм.

Аялал жуулчлалыг хөгжүүлэх сантай холбоотойгоор "Тус сан экспортыг дэмжих сан гэж ойлгож болно. Үндэсний аюулгүй байдал, импортыг орлох чиглэл рүү сан байхад асуудалгүй гэж харж байна. Аялал жуулчлалыг хөгжүүлэх сангийн ажлын алба нь жилд нэг удаа төлөвлөгөө гаргаад үндэсний хороогоор батлуулах юм. Тухайн санд төвлөрсөн мөнгийг юунд зарцуулах вэ гэдгээ тодорхой болгоно гэсэн үг.

Зам, тээврийн хөгжлийн яамнаас Урьхан шиг амралтын цэг дээр 10 орчим газарт төр, хувийн хэвшлийн түншлэлээр ариун цэврийн байгууламж барих сонгон шалгаруулалт зарласан ч гуравхан байгууллага оролцсон. Хуулийн төсөлд аялал жуулчлалын дэд бүтэц гэдэг нэр томьёо орж ирж байгаа. Алийг нь төр, алийг нь хувийн хэвшил хийх нь тухайн үед яам шийднэ" хэмээв

Х.Ганхуяг: Дотоодын нислэгийн түлш, сэлбэгийг НӨАТ-аас чөлөөлөх асуудлыг хуулийн төсөлд тусгасан