УИХ-ын 2023,04,27-ны өдрийн хуралдаанаар Монгол Улс дахь хүний эрх, эрх чөлөөний байдлын талаарх 22 дахь илтгэлийг хэлэлцлээ.

Уг асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Н.Наранбаатар:

Уул уурхайн олборлолт, ашиглалт хийж буй бүс нутагт ойрхон байгаа иргэдийн эрүүл аюулгүй орчинд амьдрах эрх зөрчигдөж байна. Тухайлбал, Өмнөговь аймгийн Цогтцэций суманд олборлолт хийгдэж байгаа. Цагаан-Овоо баг гэхэд л уул, уурхайн лицензийн талбайд орчихсон. Хүн аж төрөх ямар ч боломжгүй нөхцөл байдалтай байна. Үүн дээр та бүхэн ямар тооцоо судалгаа хийж байна вэ. Тайланд тодорхой тусгагдсан зүйл байна уу.

Түүнчлэн уул, уурхайн компанид ажиллаж буй иргэдийн эрх зөрчигдөж байна. Хөдөлмөрийн хуулийн өөрчлөлт, ажлын болон амралтын цагийн горимыг 14/14 болгосонтой холбоотойгоор уул, уурхайн шөнийн ээлжинд ажиллаж буй иргэдийн эрх мөн л зөрчигдөж байна. Мөн илүү цагийнхаа хөлсийг авч чадахгүй зэрэг асуудлууд цөөнгүй.

Уул, уурхайн тээвэрлэлтээс үүдээд малчдын эрх зөрчигдөж байна. Тухайлбал, олон салаа зам гаргахын сацуу тоос шорооны асуудалтай холбоотойгоор бэлчээр нутаг хомстох, уушгины өвчлөл, цөлжилт бий болох зэрэг асуудлууд тулгарч байна. Цаашид үүн дээр ямар зохицуулалт хийн ажиллах вэ?

Түүний асуултад, ХЭҮК-ын гишүүд хариулт хэллээ.