Улиран өнгөрч буй арван долдугаар жарны шороон үхэр жилийн “Улсын сайн малчин” цолоор Монгол Улсын хэмжээнд нийт 32 малчин шагнуулжээ. “Улсын сайн малчин” хэмээх цолыг Монгол Улсын Засгийн газраас жил бүр мал сүргээ тогтвортой өсгөж, малын чанар, ашиг шимийг сайжруулан бүтээгдэхүүний үйлдвэрлэл, ажлын байрыг нэмэгдүүлж, орон нутаг, улс орны эдийн засгийн хөгжилд хувь нэмэр оруулж өндөр амжилт гаргасан малчдад олгодог уламжлалтай.

Архангай аймгаас Тариат сумын Цагаан нуур багийн малчин М.Дамбийням болон Хайрхан сумын Могой багийн малчин С.Даваадорж нар энэхүү хүндэт цолыг хүртсэнийг УИХ-ын гишүүн Н.Батбаяр битүүний өдөр С.Даваадоржийн хотонд зочилж хүндэтгэл үзүүлэн цол тэмдгийг нь гардуулсан байна.

С.Даваадорж нь удам дамжсан сайн малчин төдийгүй ахан дүүсээрээ хоршин нийт 30 гаруй өрх хамтран малаа малладаг тул нутгийнхан нь энэ гэр бүлийг “Их гэрийнхэн” хэмээн нэрлэдэг болжээ. Тэдний орон нутгийн хөгжилд оруулсан хувь нэмрийг үнэлж, 2006 оноос хойш С.Даваадоржийг жил бүр “Улсын сайн малчин”-д тодорхойлж байжээ.
Мөн түүнчлэн Н.Батбаяр гишүүн Өлзийт сумын ахмад настан улсын заан Ж.Найдандорж, ахмад дайчин С.Цэдэнбал гуайнхаар айлчилжээ. С.Цэдэнбал гуай 1945 оны чөлөөлөх дайнд оролцсон ахмад дайчин тул Засгийн газраас ахмад дайчдад олгож буй орон сууцны түлхүүрийг энэ оны нэгдүгээр сард гардан авчээ.