Улсын Их Хурлын хаврын чуулганы өдрүүд үргэлжилж байна. Өнгөрөгч өдрүүдэд Үндсэн хуульд өөрчлөлт оруулах асуудлаар Төрийн ордон төдийгүй улс орон даяар шуугиантай байлаа.

Сонгуулийн тогтолцоог өөрчилж, гишүүдийн тоог нэмэх өөрчлөлтийг Засгийн газраас тавдугаар сарын 03-ны өдөр Улсын Их хуралд өргөн мэдүүлж, тавдугаар сарын 31-ний өдөр баталлаа.

Үндсэн хуульд өөрчлөлт оруулах тухай хуулийн төсөл УИХ-д өргөн баригдахаас эхлээд хэлэлцүүлж, батлах хүртэл өөрийн байр сууриа тодорхой илэрхийлж, итгэл үнэмшилдээ бат зогсож, иргэдийнхээ захиасыг бүрэн төлөөлж байсан хүн бол УИХ-ын гишүүн С.Ганбаатар юм.

Түүний хувьд Үндсэн хуульд оруулах өөрчлөлтийг дэмжихгүй гэдгээ илэрхийлж, ард түмний сонгох эрхэд халдаж болохгүйг сануулж байсан. Ингэхдээ Монгол Улсын Үндсэн хуулийн 68-дугаар зүйлийн 2 дахь хэсэгт заасан Үндсэн хуульд нэмэлт, өөрчлөлт оруулах асуудлаар Улсын Их Хурлын гишүүдийн гуравны хоёроос доошгүйн саналаар ард нийтийн санал асуулга явуулж болно. Санал асуулгыг Үндсэн хуулийн хорин тавдугаар зүйлийн 1 дэх хэсгийн 16-д заасан үндэслэлийн дагуу явуулна” гэснийг хуулийн дагуу явуулж өгөхийг чуулганы танхимд удаа дараа илэрхийлсэн.

УИХ-ын гишүүн С.Ганбаатар:“Үндсэн хууль бол ард түмэн төр хоёрын хооронд хийсэн гэрээ. Ард иргэдээс ор төдий жүжигчилсэн асуулга асуусан болоод, ордонд ирээд хаалгаа хааж байгаад 4/3-аараа иргэдийнхээ эсрэг гар өргөнө гэдэг байж болохгүй” гэсэн юм.

УИХ-ын дарга Г.Занданшатарын захирамжаар Үндсэн хуульд оруулах өөрчлөлтийн хуулийн төслийн талаар ард иргэдийг мэдээллээр хангаж, танилцуулга хийх, олон нийтийн оролцоог хангаж, санал бодлыг сонсох ажлыг зохион байгуулсан. Энэ хүрээнд гишүүд тойрогтоо хоёр удаа ажилласан билээ. Олон нийтийн зүгээс гишүүдийн тоог нэмэхийг эсэргүүцэж, сонгуулийн тогтолцоог дэмжсэн. Гэвч гишүүдийн тоог 126 болгохыг гишүүд дэмжиж баталсан.

С.Ганбаатар гишүүний хувьд ард нийтийн санал асуулгаар Үндсэн хуулийн өөрчлөлтийг шийдэх ёстой гэж үзсэн ч олны эсрэг ганцаар зогссон түүний үгийг Улсын Их Хурал хүлээж аваагүй. Тэрээр Үндсэн хуулийн 23-дугаар зүйлд Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална гэж заасан. Энэ бол УИХ-ын гишүүний ажил үүргийн тодорхойлолт. Үүнд УИХ-ын гишүүн нь намын, удирдлагын элч мөн гэж бичээгүй байна. Нийт иргэн, улсын ашиг сонирхлыг эрхэмлэнэ гэснээс ямар нэгэн нам дагаж далдаганана гэж бичээгүй. Нийт ард иргэд бараг 100% Үндсэн хуулийн өөрчлөлтийн эсрэг байхад иргэдийнхээ эсрэг кнопоо дарна гэдэг Үндсэн хуулийн 23-дугаар зүйлийг бид зөрчиж байна” гэж онцолсон юм.

Түүнчлэн гишүүд өөрсдөдөө зориулж хууль баталж болохгүй. Ард иргэдийн зүгээс бидэнд баталсан хууль бол гагцхүү Үндсэн хууль. Үүнд гар дүрж болохгүй хэмээсэн билээ.

С.Ганбаатар: УИХ-ын гишүүд өөрсдөдөө зориулж Үндсэн хуульд өөрчлөлт хийсэн