“Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох нь” буюу АДАПТ төсөл хэрэгжиж байна. 

Хөдөө амьдарч байгаа хүмүүс уур амьсгалын өөрчлөлтөд хамгийн эмзэг, өртөмтгий байдаг. Тийм учраас АДАПТ төсөл нь хөдөөгийн иргэдийг өдрөөс өдөрт өөрчлөгдөж байгаа уур амьсгалын өөрчлөлтөд дасан зохицож мал аж ахуйн үйл ажиллагаагаа явуулахад нь дэмжлэг үзүүлэх зорилготой.

Энэ зорилгынхоо хүрээнд гол дагасан ойг бий болгох, худаг, булаг, шандуудыг хамгаалах ажлуудыг хөдөө орон нутгуудад явуулдаг юм.

Уг төслийн хүрээнд Байгаль орчин, аялал жуулчлалын яамнаас хаврын шар ус, зуны үерийн ус болон хур борооны усыг хуримтлуулах маягаар бага оврын усан сан буюу хөв цөөрөм барьж байгуулах ажил Ховд аймгийн Үенч, Дөргөн, Манхан, Завхан аймгийн Шилүүстэй, Цэцэн-Уул, Сонгино зэрэг суманд хийгдэж байна.