(Нийгмийн толь)- Төв банк, Зүүн Өмнөд Азийн төв банкуудын холбоотой хамтран Тайланд, Япон, Солонгосын төв банкны мэргэжилтнүүдийн оролцоотойгоор "Хөрөнгийн үнийн өсөлт, мөнгөний бодлогод үзүүлэх нөлөө ба сорилт" сэдэвт зөвлөгөөнийг зохион байгуулж байна.

"Чингис" зочид буудалд өчигдөр эхэлсэн уг хурлаар хөрөнгийн үнийн хөөсрөлийг тодорхойлох, хэмжих арга зүй, хөгжиж буй орнуудын хэрэгжүүлсэн мөнгө, ханшийн бодлого зэрэг олон сэдвийг хөндөж байгаа аж. Ерөнхийдөө үнийн хөөрөгдлийн нөлөөлийн талаар хэлэлцэж буй хэмээн ойлгож болох юм. Энэ талаарх манай улс дахь хамгийн ойрын жишээ бол орон сууцны үнийн хөөрөгдөл аж.

Орон сууцны өнөөгийн ханш бодит байдлаас хэт өндөр байгааг олон мэргэжлийн хүн баталдаг. Гэвч барилгын салбарынхан үүнийг хүлээн зөвшөөрдөггүй. Үүнээс үүдэж олон сөрөг үзэгдэл гарч ирж байгаа. Тухайлбал, иргэдэд хүлээлт үүссэнээр барилгын салбарт зогсонги байдал бий болох, эсвэл иргэд хэт өндөр үнээр сууц зээлээр авснаар эдийн засшт нь дарамт учирч байна. Энэ талаар төв банкны төлөөлөгчид тайлбарлахдаа орон сууцны үнэ тогтвортой өсөх нь зөв хэмээв. Харин үнэ нь ихээхэн хэлбэлзэж байвал хөөсрөл бий болгодог аж. Ингэснээр үнийг таамаглах аргагүй байдалд хүргэдэг байна. Тухайлбал, 2008 оны үед орон сууцны үнэ богино хугацаанд хэт өссөн нь хөөсрөл бий болгож, үнийг нь таамаглах аргагүй байдалд хүргэжээ.

Дашрамд дурьдахад, төв банк Зүүн Өмнөд Азийн банкуудын холбоонд 1990-ээд оны сүүлчээр элсчээ. Ингэснээр бүс нутгийн төв банкуудын хэрэгжуүлж буй бодлогын арга хэмжээнүүдээс суралцах, санаа авах, туршлага солилцох боломж бүрдсэн байна.

Г.БАТЗОРИГ

Гадаадын төв банкуудын мэргэжилтнүүдийн зөвлөгөөн болов