(Өнөдөр)- "Дэлхийн томоохон нүүрсний ордын нэг болох Монголын Тавантолгойд ажиллах үндэсний компанийг ирэх жилийн дөрөвдүгээр сар гэхэд байгуулах гэж байна. Энд сайн чанарын коксжсон нүүрс байгаа бөгөөд Тавантолгойн олборлолтод оролцохын тулд Японы компаниуд Хятадтай өрсөлдөн, нүд салгах аргагүй болж эхэллээ" хэмээн Блүүмбэрг бичжээ.

Японд ажлын айлчлал хийж байгаа Эрдэс баялаг, эрчим хүчний сайд Д.Зоригт энэ сарын 3-нд Блүүмбэргт ярилцлага өгөхдөө Монголд хөрөнгө оруулахыг уриалахаар Японд айлчилсан гэдгээ нуусангүй.

Тэрбээр “Тавантолгойд төмрийн хүдэр гарган авахад шаардлагатай коксжсон нүүрс гэхэд доод тал нь 12 тэрбум тонн байгаа. Бид Япон тэргүүтэй гадаадын орнуудыг хөрөнгө оруулна гэдэгт найдаж байна” хэмээн ярьсан байна. 2009 онд Япон 165 сая тонн нүүрс импортоор авсны 69 сая тонн нь коксжсон нүүрс аж. Тавантолгойн нүүрсний уурхайн ашиглалтын эхний үед 15 тэрбум доллар шаардлагатай гэсэн тооцоо бий.

Д.Зоригт сайд долдугаар сарын 29-нээс эхлэн "Иточу", "Марубэни", "Сожицү", "Мицүй", "Мицүбиши" компанийн захирлуудтай уулзаж, хөрөнгө оруулалтын талаар санал солилцсон байна. Мөн Олон улсын хамтын ажиллагааны банк “JBIC”-тай хамтын ажиллагааны гэрээ байгуулжээ.

“Тавантолгойн орд газрын ойролцоо Сайншандад аж үйлдвэрийн парк байгуулах төсөл байгаа. Орд газрыг ашиглаад зогсохгүй зам тээвэр, цахилгаан станц зэрэг дэд бүтцэд ч Японы хөрөнгө оруулагчид оролцоно гэдэгт найдаж байна. Ялангуяа дулааны цахилгаан станц барих ажилд Японы техник, технологийг оруулмаар байна" гэж сайд ярьжээ.

Д. Зоригт сайд Япончуудыг хөрөнгө оруулалт хийхийг уриалав