Эдийн засгийн байнгын хорооны /2025.01.13/-ны өдрийн хуралдаанаар Монгол Улсын Засгийн газар болон Бүгд найрамдах Энэтхэг Улсын Экспорт-Импорт банк хооронд байгуулах Зээлийн хэлэлцээрийн төсөл, Монгол Улс, Олон Улсын сэргээн босголт, хөгжлийн банк хооронд байгуулах “Эрчим хүч-3 төсөл”-ийн Зээлийн хэлэлцээрийн төслийг зөвшилцөх эсэх асуудлыг хэлэлцэж дэмжлээ.

Хэлэлцэж буй асуудалтай холбогдуулан УИХ-ын гишүүн М.Бадамсүрэн байр сууриа илэрхийллээ.

Тэрбээр “Гурван удаа зээл авч, мөнгө нь нэмэгдсээр байгаад 6 их наяд төгрөг болж байгаа юм байна. Үүн дээр Хөгжлийн банкнаас гарсан 250 тэрбум төгрөгийг нэмэхээр бараг 7 их наяд төгрөг болж байна. Энэ 7 их наяд төгрөг вэ гэдгийг монголчууд мэдэх ёстой. Тухайлбал, 4,000 км зам буюу Баян-Өлгийгөөс Дорнод хүрэх, Сэлэнгээс Дорноговь хүртэл автозам барих мөнгө. Нөгөөтээгүүр 1500 сургууль, цэцэрлэг барих мөнгө шүү.

Тэгэхээр зээлийн зарцуулалтыг хянах, төслийн ажлыг эрчимжүүлэх шуурхай штаб байгуулах шаардлагатай гэсэн санал гаргаж байна. Яагаад энэ зээлийн төсөв нь өсөөд байна вэ, Энэ бол монголчуудын буцааж төлөх асар их мөнгө. Энэ талаар хариуцсан сайд ямар бодолтой байдаг вэ?

Хоёрдугаарт, Монгол Улс цаашид газрын тосны үйлдвэрээ тогтвортой, ашигтай ажиллуулах стратеги байна уу? Бидэнд түүхий тосоо экспортлох нөөц байхгүй. Байгалийн шавхагддаг нөөц учраас гадагшаа гаргахаас илүү дотооддоо ашиглах нь зөв. Энэ бол үйлдвэрийг ашигтай, тогтвортой ажиллуулах, үндэсний аюулгүй байдлаа хамгаалах хамгийн том бодлого.

Түүнчлэн үндэсний хайгуул олборлолтын компани байгуулах ёстой. Өөрөөр хэлбэл бид үнээгээ гадны компаниудаар саалгаж болохгүй. Газрын тосоо бага экспортолж байгаа нь ашигтай ч байж магадгүй шүү” хэмээв.

М.Бадамсүрэн: 7 их наяд төгрөг 4000км авто зам, 1500 сургууль, цэцэрлэг барих мөнгө шүү