Өчигдөр /2025.03.20/ болсон УИХ-ын даргын 2025 оны 68 дугаар захирамжаар Монгол хүний амьдралын чанарыг дээшлүүлэх, хүн амын өсөлтийг дэмжих асуудлаар холбогдох хууль тогтоомжийн хэрэгжилтийг эрчимжүүлэх, үр нөлөөг дээшлүүлэх асуудлыг судалж, цаашид авах арга хэмжээний талаар санал, дүгнэлт танилцуулах, шаардлагатай бол холбогдох хуулийн төсөл боловсруулах үүрэг бүхий ажлын хэсэг анхны хуралдааны үеэр Ажлын хэсгийн ахлагч УИХ-ын гишүүн Д.Үүрийнтуяа Хүний амын өсөлтийг дэмжих хөшүүрэг болж буй "Алдарт эхийн одон" олгох тухай хуульд өөрчлөлт, шинэчлэл хийх зайлшгүй шаардлага байгааг онцолсон юм. 

Тэрбээр "Бид 14 мега төсөл, ЭЗ-ийн өсөлтийг авчрах томоохон бүтээн байгуулалтуудыг санаачлаад мөрийн хөтөлбөртөө оруулж ажиллаад явж байна. Эцсийн дүнд бид юуны төлөө үүнийг хийж байна вэ? Хүнээ сайхан амьдруулахын төлөө, хүнээ хөгжүүлэхийн төлөө, хүн амаа өсгөхийн төлөө биш гэж үү. Аливаа улсын тусгаар тогтнолын суурь нь газар нутаг, хүн ам. Монгол улсын тусгаар тогтнолын нэг суурь нь хүн амын бодлого, хүн ам зүйн асуудал учраас анхаарахаас өөр аргагүй. Анхаарлын төвд байх хэмжээнд оччихоод байгаа. Миний амбиц болоод Ажлын хэсгийг ахалж байгаа УИХ-ын гишүүний хувьд хүн ам зүйн асуудал, хүн амын өсөлтийн асуудлыг Үндэсний Аюулгүй байдлын хэмжээнд аваачих юм.  Ийм амбицтайгаар би ажлын хэсгийг байгуулж ажиллаж байна. Хүний амын өсөлтийг дэмжих хамгийн эхний бөгөөд том хөшүүрэг нь 1957 оноос "Алдарт эхийн" одон олгож эхэлсэн шийдвэр. Энэ цагаас хүм ам огцом өссөн. Дараа нь алтан гахай жил, хүүхдийн мөнгө, цалинтай эхийн тэтгэмжийн асуудлууд. Монголын хүн амын өсөлтөд гол хөшүүрэг болж өгсөн эдгээр асуудлууд дээрээ өөрчлөлт шинэчлэл хийх ёстой. Тухайлбал одоо хүчин төгөлдөр мөрдөгдөж байгаа 2010 оны "Алдар эхийн одон"-ийн хуулинд төрөөд 0-1 насандаа нас барсан хүүхдийг одонгийн хүүхдийн тоонд хамааруулахгүй байгаа. Хэдийгээр ажлын хэсэг хуралдаагүй ч бид энэ талаар нухацтай ярилцаад явж байна.

Монголын эхчүүд төрдөө гомдол тээгээд явж болохгүй. Үр хүүхдээ алдаад тэр шаналал дээр нь бид ялгавартай хандаж болохгүй. Өнөөдөр "Алдарт эх"-ийн 1, 2-р одон авч байгаа ээжүүд, одон авах гээд нас барсан хүүхдээ оруулж тооцуулж чадахгүй байгаа ээжүүдийн статистик судалгааг авч үзмээр байгаа юм. Ямар эдийн засгийн үр дагавар гарах вэ гэдгийг тооцож байж хуулийнхаа төслийг өргөн барих асуудал дээрээ анхаарах ёстой." гэжээ.