Улсын Их Хурлын гишүүн Ж.Баясгалан  2025 оны 04 дүгээр 16-ны өдөр Хөвсгөл аймгийн Нэгдсэн эмнэлгийн үйл ажиллагаатай танилцаж, ЭМД-ын гүйцэтгэлийн санхүүжилтийн талаар ярилцлаа.Уулзалт, ярилцлагад тус аймгийн Эрүүл мэндийн газрын дарга М.Үүрийнбаяр, Нэгдсэн эмнэлгийн захирал Г.Оюунжаргал болон холбогдох албан тушаалтнууд, эмнэлгийн ажилтнууд оролцсон болно.

Уулзалтын эхэнд Нэгдсэн эмнэлгийн захирал Г.Оюунжаргал эмнэлгийн бүтэц, зохион байгуулалт, хийж, хэрэгжүүлж байгаа ажлынхаа талаараа болон тулгамдаж буй асуудлаа танилцуулсан юм. Аймгийн нэгдсэн эмнэлэг нь 355 ортой, жилд дунджаар 11,700 хүнийг хэвтүүлэн эмчилж, 1800 гаруй хүнд мэс заслын тусламж, үйлчилгээ үзүүлдэг байна. Жилдээ амбулаторийн үзлэгт 214,000 хүн хамрагдаж байгаагаас дүрст оношилгоог 65,000 хүн, лабораторийн шинжилгээг давхардсан тоогоор 961,000 хүн хийлгэж байгаа бөгөөд эрт илрүүлэг, урьдчилан сэргийлэх үзлэгт 4000 хүн хамрагдсан байна.

Үзлэгт хамрагдагсдын дийлэнх нь зүрх судас, цусны эргэлт, амьсгалын зам, хоол боловсруулах эрхтний өвчин, бэртэл, хордлого, халдварт өвчин эзэлж байгаа аж.Хөвсгөл аймаг нь бусад аймгуудтай харьцуулахад хүн ам ихтэй тул төрөлтийн тоо, хувь хэмжээ өндөр байсан боловч сүүлийн 4 жилийн хугацаанд жил тутам төрөлтийн тоо 200-аар буурчээ. Нярайн эндэгдэл 2024 онд нэмэгдсэн нь зүрхний төрөлхийн гажиг, ургийн урвуу байрлал зэрэг ургийн гажгуудаас үүдэлтэй байна. Хөвсгөл аймгийн эмнэлэг нь 2021 оноос эхлэн хавдрын мэс засал, хавдрын бай эмчилгээ, химийн болон хөнгөвчлөх эмчилгээг хийж, хавдрын биопсийн шинжилгээг хийж эхэлсэн байна.

Өнөөдрийн байдлаар тус аймгийн нэгдсэн эмнэлэг шиг хавдрын хагалгааг бие даан хийж, хавдрын тусламж, үйлчилгээг цогцоор нь үзүүлж байгаа аймаг байхгүй байгаа бөгөөд хавдрын тусламж, үйлчилгээг цогцоор нь үзүүлж буй анхны аймаг болсон гэдгээ Захирал Г.Оюунжаргал бахархалтайгаар бидэнд танилцуулсан юм.Мөн анх удаа эмч, ажилтнуудынхаа ажлын ололт, амжилтыг дүгнэж, 13 дахь сарын цалин буюу бүтээмжийн урамшууллыг олгожээ.

Тус нэгдсэн эмнэлэг нь 2021-2024 онуудад санхүүгийн өргүй гарсан байна.Цаашид тус эмнэлэг нь хэвлийн дуран, ангиографи, MRI, мэс заслын вакум хагалгааны өрөөтэй болох зорилго тавин ажиллаж байгаа юм байна. Уулзалтад оролцогчид малчид, хувиараа хөдөлмөр эрхлэгчид болон ажилгүй иргэдийн 40 хувь нь л эрүүл мэндийн даатгалд хамрагдаж байгаа тул цаашид Эрүүл мэндийн даатгалд хамрагдах иргэдийн тоог нэмэгдүүлэх үүднээс иргэдэд даатгалын тухай ойлголт, ач холбогдол, түүнчлэн даатгал төлснөөр авч болох үйлчилгээний талаарх мэдээллийг түгээх, мэдээлэл, сурталчилгааны ажлыг эрчимжүүлэх шаардлагатай байна гэсэн болно.