Засгийн газрын хуралдаанаас төмөр замын төрийн өмчит компаниудыг нэгтгэх шийдвэр гарч тодорхой хугацаа өнгөрч байгаа. Үүний дагуу “Тавантолгой төмөр зам” ХХК, “Монголын төмөр зам” ТӨХК-иудын шинэ бүтэц орон тоо, ажлын хариуцлага, үр ашгийн тооцоо судалгааг хийж дуусжээ. Харин ажилтнуудыг нь чөлөөлөх, сонгон шалгаруулалтаар дахин ажилд томилох ажлыг энэ долоо хоногоос хийж эхэлнэ гэж Зам тээврийн сайд Б.Дэлгэрсайхан мэдээлсэн юм.

Тэрээр дээрх ТӨХК-иудын удирдлагууд, ажилтан алба хаагчидтай уулзах үеэрээ энэ мэдээллийг өгсөн. Уулзалтаар Зам тээврийн сайд ашиггүй ажилладаг төрийн өмчит төмөр замын компаниудыг нэгтгэх тухай Засгийн газрын тогтоол шийдвэрийг танилцуулаад, төрийн өмчит компаниудын төмөр замын бүтээн байгуулалтад зарцуулсан хөрөнгө, ажлын үр дүн, эдийн засгийн үр ашиг хангалтгүй байгааг тооцоо судалгаатай тодорхой дурдлаа.

Ингэхдээ төмөр замын салбарт адил төстэй үйл ажиллагаа эрхэлж буй хувийн компаниудын үйл ажиллагаатай харьцуулсан дүгнэлтүүдийг дурдаж, төрийн өмчид байгаа төмөр замын компаниудыг бүтэц орон тоог нэгтгэж, ажлын бүтээмж, менежментийг нь сайжруулах ажлыг шат дараатай хийж эхлэхээ мэдэгдсэн. Одоогоор “Тавантолгой төмөр зам” ХХК 800 хүнтэй, “Монголын төмөр зам” ТӨХК 600 гаруй хүнтэй ажиллаж байна. 

Сэтгүүлч

Сэтгүүлч Ц.Соёлмаа soyolmaa@vip76.mn