Монгол Улсын Их Хурлаас баталсан Бүсчилсэн хөгжлийн үзэл баримтлал, Засгийн газрын 2024-2028 оны үйл ажиллагааны мөрийн хөтөлбөр, Засгийн газраас хэрэгжүүлж буй “Шинэ сэргэлтийн бодлого”, Дорноговь аймгийн Засаг даргын “Тогтвортой бодлого-Тасралтгүй хөгжил” мөрийн хөтөлбөр орон нутагт амжилттай хэрэгжиж байна.

Энэ хөтөлбөрийн хүрээнд шавыг тавьж буй “Сингл апартмент” орон сууцны төсөл нь дөнгөж их дээд сургууль, коллеж, мэргэжлийн сургуулиа төгсч, ажил амьдралын гараагаа эхлүүлж буй залуучуудыг дэмжихэд чиглэж байгаараа онцлог юм.

Уг орон сууцанд орон нутагт ажиллахаар ирсэн ганц бие залуучууд, шинэхэн хосууд 5 жил хүртэл хугацаатайгаар түрээслэн амьдарч болох бөгөөд энэ хугацаанд байрны урьдчилгаа мөнгөн хуримтлалыг үүсгэн ипотекийн зээлэнд хамрагдах замаар орон сууцны асуудлаа шийдвэрлэх боломжийг бүрдүүлэх зорилгоор 21 аймгаас анх удаагаа аймагтаа хэрэгжүүлж байна.