УИХ-ын чуулганы /2025.10.31/-ний өдрийн хуралдаанаар УИХ-ын гишүүн Х.Булгантуяаг Дэд даргын үүрэгт албаас чөлөөлөх асуудлыг хэлэлцэх байв.

Гишүүд уг асуудлаар байр сууриа илэрхийлэв.

УИХ-ын гишүүн, МАН-ын бүлгийн дарга Ж.Батжаргал:

Хууль тогтоох парламентын засаглал хууль дээдэлж ажиллах ёстой. Бид зааг ялгаатай ярьцгаах ёстой. УИХ-ын гишүүн бол ард түмний мандат. Сонгууль зохион байгуулж явуулдаг байгууллага сонгуулийнхаа дүнг Их Хуралд танилцуулаад тэнд бүрэн эрх хүлээн зөвшөөрөгддөг.

Их Хурлын дэд дарга гэдэг бол УИХ-д бүлэгтэй улс төрийн хүчнүүд саналаа гаргаж томилуулдаг. Тийм учраас МАН-ын бүлэг УИХ-ын гишүүн, бүлгийн гишүүн Х.Булгантуяагийн ажлын туршлага чадамжийг нь үнэлж, улс төрийн дэмжлэг үзүүлж УИХ-ын дэд даргаар сонгосон. ҮХЦ зөрчил гаргасан байна гэж дүгнэлээ. Тийм учраас намын бүлэг өөрийнхөө дэмжлэг үзүүлсэн албан тушаалаас нь огцруулж байгаа юм аа. Энэ асуудал УИХ дээр байнгын хороогоор ордоггүй юм.

Намын бүлгийн санал чуулган дээр танилцуулагдаад Их хурлын гишүүд саналаа өгөөд асуудал шийдэгддэг. Нэгэнт УИХ дахь МАН-ын бүлэг буюу олонх өөрийн дэд даргыг огцруулсан бол хуульд заагдсаны дагуу дэд даргаа томилуулах, нэр дэвшүүлэлтээ хийсэн. Үүнийгээ УИХ-д өргөн мэдүүлж, уламжилсан.

Тиймээс МАН-ын бүлгээс УИХ-ын дэд даргад нэр дэвшүүлсэн хүний талаар энд ярилцаж санал хураалт явуулж, сонгох учиртай. Цэцийн дүгнэлттэй холбоотой асуудал бол Их хурлын бүрэн эрхийн асуудал аа. Бид тухайн хүнд үзүүлсэн улс төрийнхөө дэмжлэг, бүлгийн квот дээр байгаа Их хурлын дэд даргынхаа асуудлыг ярьж байгаа.

Ж.Батжаргал: Намын бүлэг өөрийнхөө дэмжлэг үзүүлсэн улстөрчөө албан тушаалаас нь огцруулж буй асуудал байнгын хороогоор орохгүй