УИХ-ын чуулганы /2025.11.27/-ны өдрийн хуралдаанаар Тамхины хяналтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэв.

Хэлэлцэж буй асуудалтай холбогдуулан гишүүд асуулт асуув.

УИХ-ын гишүүн А.Ариунзаяа:

Хуулийг дэмжиж байгаа. Өргөн барьсан гишүүдийн нэг нь би. Яагаад дэмжиж байгаа болон тодорхой мэдээллийг иргэдэд өгөөч гэж хүсмээр байна. Тамхины үнэ хэдэн төгрөг болох гээд байгаа тэр тодорхой үнийг нь хэлээд өгөөч л гэж хүсээд байгаа юм. Өнөөдрийн байдлаар янжуур тамхи 1 хайрцаг нь дунджаар 3850 төгрөг. Онцгой албан татвар 5-20 хувь. Үүнийг 30 хувь болгоно гэж ярьж байгаа.

Тэгэхээр 3 жилийн дараа мөнгөн дүн хэдэн төгрөг болох гээд байгаа вэ? 30 мянга уу, 20 мянга уу гээд яг үнийн дүнгээр нь хариулах хэрэгтэй. Эс тэгвээс үүн дээр суурилаад хайрцаг тамхины үнэ 30 мянган төгрөг болох гэнэ, янжуур тамхины лобби хийлээ гэсэн харлуулах ажиллагаа явж байна.

Цахилгаан тамхи адилхан хортой. Үүнийг мэдэж байгаа юмуу, үгүй юмуу хэлж мэдэхгүй юм. Янжуур тамхи буюу утаат тамхийг тамхины цэгт л татдаг, харин vape-ийг хаа дуртай газраа татаад байна. Муухай үнэргүй, хувцсанд чинь шингэхгүй, чамд ямар ч хоргүй гээд. Гэтэл үгүй. Агаар дуслаар дамжаад жижигхэн химийн элементүүд дам тамхидалтыг үүсгэж байгаа.

Адилхан хортой гэдгийг хүлээн зөвшөөрч, аль алинаас нь гаалийн онцгой албан татвар авах ёстой. Ингэж гэмээ нь үнэн дээр ч тэр, тамхидалтын хувь хэмжээ багасгахад ч тэр нөлөөлнө.

Мөн түүнчлэн ЗГ-ын тусгай сангаас зарцуулах онцгой албан татварын дүнг эргүүлээд хүүхдүүддээ зарцуулах боломжийг бүрдүүлнэ. Тиймээс тодорхой үнийн дүнгээр хариулж өгөхийг хүсэж байна.

А.Ариунзаяа: Электрон тамхины жижиг химийн элементүүд агаар дуслаар дамжиж дам тамхидалтыг үүсгэж байгаа