МАН-ын Бага хурал эхэлж, хурлыг нээн намын дарга Н.Учрал илтгэл тавилаа.

Тэрээр, бид эрх чөлөөг хамгаалахаар цуглалаа. Эрх мэдэл биш эрх чөлөөг хамгаалахын төлөө ухаанаа уралдуулах цаг болсон. Эрх чөлөө бол итгэлцэл, хүч, ардчилсан нийгмийн амьсгалах агаар, шударга ёс, эв нэгдлийн гагнаас юм. Иймд "Эрх чөлөөний дөрвөн зам, дөрвөн чөлөөлөлт" уриатай бид хуралдаж байна.

МАН ард түмэндээ эргэн ирнэ гэх гурван сарын өмнө хэлсэн үгэндээ хүрэхээр би энд зогсож байна. Та бүхний итгэл, дэмжлэгээр МАН-ын дарга болж уламжлал дээр суурилсан шинэчлэлийн төлөө хичээн ажиллаж байна.

МАН шинэ сорилтын өмнө ирсэн. Намын 105 жилийн ой, эх орончдын баярыг тэмдэглэхийн учир ч үүнд оршино. МАН унасан ч босдог, уруудсан ч өгсдөг нам гэдгээ батлан харуулах нь бидний хариуцлага юм. Ардынхаа итгэлд эргэн ирэх чиг шугамаа өнөөдөр бид хамтдаа тодорхойлон гаргана.

Дэлхийн цаг төрийн байдлыг харгалзан үзэж, үндэсний ондоошил, дэлхийд Монголоороо үлдэх торгон агшин ирсэн. Тусгаар тогтнолоо эдийн засгийн тусгаар тогтнолоор гагнах болно. Эдийн засгийн өсөлтийг иргэдийн үүдээр хүргэнэ.

Эх орны эрдэс баялгаа илүү үнэд хүргэнэ.Түүхий эдийг түүхийгээр нь гаргадаг гэрийн даалгаврыг өөрчилнө. Уул уурхайгаас хамааралтай эдийн засгаа төрөлжүүлэх зэрэг хийх ажил их байна.

2026 онд ДНБ 100 их наядыг давах төлөвтэй байна. Үндэсний баялгийн сангаа бид тодорхойллоо. Монгол улсын цахим шилжилт гурван жилд 28 байраар урагшилсан. Нислэгийн салбарыг либералчилснаар иргэдийн халааснаас гарах зардлыг бууруулсантай адил банк санхүү, эрчим хүний салбарыг энэ шугамаар явуулна.

Өрнөөс өрийн хооронд өдөр хоног өнгөрч байна. Зээлийн өндөр хүү үнийн өсөлтөд шингэж бид илүүг төлж амьдарч байна. Мөнгөний бодлого мөнгөгүй болох бодлого болсон. Татуулж хэзээ ч дуусдаггүй татаасын орон боллоо. Гадаадын хөрөнгө оруулалт 2025 онд 50 хувь багассан. Гадаад, дотоодын хөрөнгө оруулагчид хуурамч эх орончдод хөөгдөх гэж ирэхгүй. Гадаадад бүү хэл дотоодод өөрсдөө ч ойлгохгүй хийрхлийн дунд хөрөнгө оруулагчдыг алдаж байна.

Эрчим хүчний үнийг хүчээр барьж, өрсөлдөөний боомилсны үр дүнтэй бид нүүр туллаа. Өвгөрч хуучирсан тогтолцоог үндсээр нь өөрчлөх ёстой боллоо.Хавтгайрсан халамжаас салж, хөдөлмөр хийх орчныг бүрдүүлэх цаг боллоо.

Тэрээр парламентын танхимаас хулгай, авилга бус хууль тогтоомж төрдөг байх зарчмыг баримталж, эрх тэгш хандах бодлогыг нэн тэргүүнд тавин ажиллаж байгаагаа илэрхийлэв.

Эрх чөлөөний дөрвөн зам, дөрвөн чөлөөлөлт:

Нэг дэх зам: Эдийн засгийн чөлөөлөлт- Хүнд суртал, хууль журмын чөдөр тушаанаас хувийн хэвшил, иргэдээ чөлөөлнө
Хоёр дахь зам: Эрх зүйн чөлөөлөлт-Хуулийн хулгай, хийдэл давхардал, дүрэм журмын гох дэгээнээс чөлөөлнө
Гурав дахь зам: Ногоон хөгжлийн чөлөөлөлт- Сэргээгдэх эрчим хүний дундаршгүй их нөөц, өгөгдлөө түшиглэн, түлш шатахуун, тог цахилгааны импортын хараат байдлаас чөлөөлнө
Дөрөв дэх зам: Авлигын эсрэг чөлөөлөлт- Монгол хүн, монгол өрх айл бүрийг тонон дэээрэмдсэн авлигаас ард түмэн, ардчилсан төрөө Ардын нам чөлөөлнө гэв.

МАН-ын бага хурал "Эрх чөлөөний дөрвөн зам, дөрвөн чөлөөлөлт" уриатай хуралдаж байна