Манай улс шиг цаг уурын нөхцөлөөс хамаарсан өндөр эрсдэлтэй, ган, хуурайшил, хэт халуун, хяруу, мөндөр, үер зэрэг гамшигт үзэгдлийн өндөр давтамжтай нөхцөлд газар тариалан эрхэлнэ гэдэг тийм ч хялбар зүйл биш! Өндөр эрсдэлтэй гэдгийг газар тариалангийн салбарын мэргэжилтнүүд хэлдэг.

Дээр дурдсан эрсдэлээс тариаланчдын орлогыг хамгаалах нь нэн чухал байна. Хэрэв тариаланчдын орлогыг даатгалаар хамгаалахгүй бол тариаланчид энэ салбараас дайжих эрсдэлтэйн дээр үндэсний хүнсний аюулгүй байдал, боловсруулах үйлдвэрийн түүхий эдийн тогтвортой хангамж алдагдаж, хөдөөд ажлын байр, иргэдийн өрхийн орлого тасрах эрсдэлтэй нүүр тулна.

Тэгвэл УИХ-ын гишүүн С.Эрдэнэболд “Тариалангийн индексжүүлсэн даатгалын тухай” хуулийн төслийг санаачлан боловсруулж байгаа юм. Тухайлбал, Тариалангийн индексжүүлсэн даатгалын тухай хуулийн төсөл нь бодит нөхцөлд тулгуурлан боловсруулагдсан бөгөөд одоогийн уламжлалт ургацын даатгалын нэг гол хүндрэл нь бодит хохирлыг газар дээр нь очиж тогтоон үнэлэх аргачлалтай холбоотой аж.

Харин индексжүүлсэн даатгалын үндсэн санаа нь өөр. Энэ даатгал нь бодит хохирлыг заавал газар дээр тогтоохын оронд, тухайлбал хур тунадас, температур, хөрсний чийг, эсвэл хосолмол индекс зэрэг албан ёсны мэдээллийн эх сурвалжид тулгуурласан статистик үзүүлэлтүүд урьдчилан тогтоосон босго нөхцөлийг хангаж байгаа эсэхэд үндэслэн нөхөн төлбөр олгодог. Өөрөөр хэлбэл, төлбөр олгох үйл явц илүү шалгаж болохуйц, ил тод, шуурхай байх боломжтой. Энэ нь тариф, төлбөрийн хүснэгтийг зөв загварчилсан тохиолдолд даатгалын системийн итгэлцлийг нэмэгдүүлж, зах зээлийг тэлэх суурь болдог.

УИХ-ын гишүүн С.Эрдэнэболд "Шууд утгаараа Монгол Улсын хүнсний аюулгүй байдал Монгол хүний аюулгүй байдал цаашлаад Монгол Улсын Үндсэн хууль дээр байгаа Монгол Улсын иргэн хүний эрхийн асуудалд эрүүл аюулгүй орчинд амьдрах эрхээ хангуулахад шууд утгаараа холбоотой. Энэ бол Монгол Улсын хувьд хөгжил дэвшлийн нэгэн чухал сэжим зохицуулалтын бүрдэл гэж үзэж байгаа юм. Тус хуулийн зорилго нь тариалангийн үйлдвэрлэлд учруулж буй уур амьсгалын эрсдэлийг бууруулах тариаланчдын орлогыг тогтвортой байдлыг хангах зорилгоор индексжүүлсэн даатгалын тогтолцоог бий болгож, хэрэгжүүлэх эрх зүйн орчныг бүрдүүлэхэд оршиж байгаа” гэв.

Тариалангийн индексжүүлсэн даатгалын тухай хуулийн төсөл 9 бүлэг, 29 заалттай. Хууль батлагдвал тариалангийн салбарт үйл ажиллагаа явуулж буй иргэд ААН-д даатгалын хууль эрх зүйн томоохон дэмжлэг болно гэж үзэж байна.

Байгаль, цаг уураас хамаарч тогтворгүй болж байгаа тариаланчдын орлогыг даатгалаар хамгаална!