Үйлдвэрлэлийн осол, мэргэжлээс шалтгаалсан өвчний дийлэнх хувийг гэмтлийн өвчин эзэлж байна. Жил бүрийн 4 дүгээр сарыг “Хөдөлмөрийн аюулгүй байдал, эрүүл мэндийн сар” болгон тэмдэглэн, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, ажилтны эрүүл мэндийг хамгаалах, аюулгүй ажиллагааны соёлыг төлөвшүүлэх чиглэлээр Гэр бүл, хөдөлмөр, нийгмийн хамгааллын яамнаас үе шаттай арга хэмжээнүүдийг зохион байгуулдаг.

Энэ хүрээнд “ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ МЭНДИЙН УРЬДЧИЛАН СЭРГИЙЛЭЛТИЙН ЦОГЦ АЯН-2026” арга хэмжээний нээлт 2026 оны 4 дүгээр сарын 7-ны өдөр боллоо.Тус үйл ажиллагаанд Нийгмийн даатгалын ерөнхий газрын дарга Б.Батжаргал оролцож, Нийгмийн даатгалын байгууллагын үйл ажиллагааны талаар мэдээлэл хүргэлээ.

Тухайлбал, үйлдвэрлэлийн осол, мэргэжлээс шалтгаалсан өвчний даатгалын сангаас олгож буй тэтгэвэр, тэтгэмж бусад үйлчилгээний талаар мэдээлэл өглөө. Тэрбээр 2022-2025 онд нийт 234 гаруй мянган даатгуулагчийн тэтгэмжид уг сангаас 258.3 тэрбум төгрөг зарцуулсаныг онцолсон юм.

Мөн арга хэмжээнд Сүхбаатар дүүргийн Нийгмийн даатгалын газраас оролцож, ажил олгогчид, ажилтан, хувиараа хөдөлмөр эрхлэгчдэд нийгмийн даатгалын зөвлөгөө, мэдээлэл өгч ажиллалаа.Цаашид хөдөлмөрийн аюулгүй байдал, эрүүл мэндийн урьдчилан сэргийлэлтийг сайжруулах, эрсдэлийг бууруулах, аюулгүй ажиллагааны соёлыг төлөвшүүлэхэд төр, хувийн хэвшил, иргэдийн хамтын оролцоо чухал ач холбогдолтой юм.

Хөдөлмөрийн аюулгүй байдлыг сайжруулах, эрсдэлийг бууруулахад төр, хувийн хэвшил, иргэдийн хамтын оролцоо чухал