Нийгмийн даатгалын ерөнхий газрын дарга Б.Батжаргал, Бодлогын хэрэгжилт, төлөвлөлтийн газрын дарга Ц.Ганцэцэг нар Нэгдсэн Үндэстний Байгууллагын Хүүхдийн сангийн Нийгмийн бодлогын ахлагч Б.Мөнхтуултай уулзлаа.

Нийгмийн даатгалын ерөнхий газар нь 2024 онд Нэгдсэн Үндэстний Байгууллагын Хүүхдийн сангийн санхүүгийн дэмжлэгтэйгээр “Монгол Улсын тэжээгчээ алдсаны тэтгэвэр авагч хүүхдүүдийн нөхцөл байдлын судалгаа”-г хийсэн.

Энэхүү судалгааны хүрээнд хууль эрх зүй, статистик мэдээлэл, тэтгэвэр тогтоолт, олголтын процесс зэргийг судалж, хүүхдүүдийн нөхцөл байдлыг тодруулах зорилгоор “мөнгө авагч” эцэг, эх, асран хамгаалагч, харгалзан дэмжигчдийн төлөөлөлтэй фокус ярилцлага хийж, хүүхдийн эрх ашгийг хангах, нийгмийн хамгааллын үйлчилгээ үзүүлэгч байгууллагын төлөөллийг оролцуулсан хэлэлцүүлэг, ярилцлагыг зохион байгуулж холбогдох санал, зөвлөмж гаргасан.

Уулзалтаар цаашдын хамтын ажиллагааны талаар тухайлбал, 2024 онд хийсэн судалгааны тоо, мэдээллийг шинэчлэх, нийгмийн даатгалын сангийн болон нийгмийн халамжийн сангийн төсвийн үр ашгийг нэмэгдүүлэх, хяналтыг сайжруулах зорилгоор хамтарсан баг бүрдүүлж, хүүхдэд олгож байгаа тэтгэвэр, тэтгэмжүүдийн хүртээмжийг аймаг, суманд судлах, хамтарсан баг ажиллуулах, асран хамгаалагч, харгалзан дэмжигчийг тогтоох үйл ажиллагаанд хяналт тавих, хүүхдийн эрхийг хамгаалах, хүүхдэд илүү ээлтэй, үр ашигтай байдлаар үйлчилгээг сайжруулах чиглэлээр харилцан ярилцаж, санал солилцлоо.

НҮБ-ын хүүхдийн сангийн төлөөлөгчтэй уулзлаа