Олон жил яригдаад байдаг хэрнээ олигтой хөдөлж өгдөггүй Сэргээгдэх эрчим хүчний ач тус, технологийн шийдэл, төрийн бодлогын шинэчлэлийг бүх аймгуудаар явж, танилцуулж, ойлгуулж, манлайлал үзүүлж буй гишүүн бол М.Энхцэцэг гишүүн. Түүнтэй хамт Б.Уянга гишүүн сэргээгдэх эрчим хүчний чиглэлээр Дорноговь, Говьсүмбэр аймгуудаар ажиллаа.

Эрчим хүчний салбарын олон аж ахуйн нэгжүүд үзэсгэлэнд нэгдэж, өөрсдийн нэвтрүүлж буй болон гаргаж буй шийдлүүдийг танилцуулж, орчин үеийн дэвшилтэт технологуудыг дэлгэн үзүүллээ. Өнөө хүртэл явж ирсэн салбарын алдаа оноог хүртэл нээлттэй ярилцлаа. Асуудлаа сайн мэдэж байна. Анхаарч сонсоод, ойлгоод авах гэж л хичээлээ.

2020 он гараад Монгол улсын нутаг дэвсгэрийн хэмжээнд нарны илч, тусгац хаана хамгийн их, удаан байдгийг, салхи хаана хүчтэй, тогтвортой байдгийг, усан цахилгаан станцыг хаана барих ёстойг, гүний дулааны эх үүсвэр хаана илүү байгааг судалсан олон улсын тайлан хийгдсэн байдаг. Нар болон салхины хувьд Говийн бүсийг хамгийн тохиромжтой байршил гэж зааж. Одоо ингээд суурь судалгаа нь бэлэн, мэргэжилтнүүд нь бэлэн, аж ахуйн нэгжүүд нь бэлэн байхад төрийн зөв бодлогоор л дэмжих хэрэгтэй байна.

Монгол Улсын Эрчим Хүчний Яамны төлөөлөл Өмнөговь болон Дундговь аймгуудад хамт явж, саяхан шинэчлэгдсэн журмаа танилцуулан, тайлбарлан явсан. Харин Дорноговь, Говьсүмбэр аймгуудад ирсэнгүй. Эсвэл ирүүлсэнгүй юу. Төрийн бодлогыг хэрэгжүүлэгч субьект нь өөрөө байгалиас заяагдсан, барагдашгүй нөөц болох нар салхийг ашиглах нь зүйтэй гэдгийг мэдэж байгаа гэж найдъя.

Монголын Алт МАК цемент, шохойн үйлдвэр дөнгөж 1 сарын өмнө ашиглалтад оруулсан 19 мВт-ын нарны эрчим хүчний станцаа танилцууллаа. Бидэнд ажиллах хүч, тэр дундаа чадварлаг нь хангалттай байгааг ойлгож, мэдлээ.

Дан уул уурхай, ашигт малтмал, байгалийн нөөц гэж анхааран явдаг миний хувьд Эрчим хүчний салбарын өнөөгийн нөхцөл байдлыг илүү сайн мэдэрч, ойлгож авсан өгөөжтэй уулзалтууд боллоо. Эрчим хүчний салбар уул уурхайтай харьцуулшгүй маш олон зөвшөөрөл дунд үйл ажиллагаа нь хөвөрдөг салбар юм байна. Үйлдвэржсэн орон болно гэвэл очоод л гацдаг эрчим хүчний эх үүсвэрээ шийдвэрлэх л учиртай байна.

Үйлдвэржсэн орон болъё гэвэл очоод л гацдаг эрчим хүчний эх үүсвэрээ шийдье!