Эдгээр өдрүүдэд хууль тогтоох дээд байгууллага Парламент нэгдсэн чуулганаараа ТӨСВИЙН хуулиудыг хэлэлцэж буй. Энэ хүрээнд 2027 оны Монгол Улсын хөгжлийн төлөвлөгөөний тэргүүлэх чиглэлээс Боловсролын салбар хасагдсан нь салбараа төлөөлөн ажиллаж байгаа гишүүд, экспертүүдийн анхаарлыг татаад буй.

Нөгөөтэйгүүр Боловсролын багц хууль хэрэгжээд гурван жил болсон ч процесс, үр дүн одоо хэр нь тодорхойгүй хэвээр.

УИХ-ын гишүүн Ж.Галбадрах боловсролын салбарт тулгамдаж буй асуудлыг эрэмбэлж, бодлого шийдлийг нь тодорхойлж, тооцоо судалгаа хийх Ажлын хэсгийг ахалсан юм. Үр дүнд нь Боловсролын чанарыг Багшийн хомсдлыг арилгах, сургуулийн хүртээмжийг нэмэгдүүлэх нь нэн тэргүүний асуудал болохыг тодорхойлсон юм.

Монгол Улсад 40-өөс дээш хүүхэдтэй суралцаж буй сурагчдын тоо 214 мянга даваад буй. Иймд 108 сургууль шинээр барих, тэгэхдээ хаана нь хэчнээн хүүхдийг эрх тэгш суралцах эрхийг хангах шаардлагатай болохыг нарийвчлан тооцож гаргасан үр дүнг яамд, газруудад хүргүүлсэн ч бодлогын баримт бичгүүдэд тусгахгүйгээр үл барам, батлагдсан төслүүдийг зогсоох нөхцөл байдал бий болоод байгаа юм.

Тиймээс үзэл санаагаараа нэгдсэн 20 гишүүн “УИХ дахь Боловсролыг дэмжих лобби бүлэг” байгуулж, УИХ-ын гишүүн Ж.Галбадрах ахлан ажиллахаар боллоо.

Лобби бүлэг нь тухайн асуудлыг бүхий л түвшинд харж, бодлого боловсруулан, дуу хоолойгоо нэгтгэж шийдвэр гаргалтад оролцохыг зорьдог.

Тус бүлгийн хувьд

1. Боловсролын салбарт хамгийн түрүүнд хийх ажлуудыг эрэмбэлнэ.

2. УИХ-д 2027 оны төсвийн хүрээг ярьж буй энэ үед дуу хоолойгоо нэгтгэн шийдвэр гаргалтад оролцохоор зорж байгаа аж.

УИХ-ын гишүүн Ж.Галбадрах "Боловсролын бодлого дутагдаж байна. Ядуурлаас гарах ганц зөв гарц нь боловсролдоо хөрөнгө оруулах юм. Манай бүлэгт одоогоор нэгдээгүй гишүүд нэмэгдэж болно. Бид боловсролыг өргөн хүрээнд авч үзнэ. Хүүхдийн хөгжилтэй ч энэ асуудал шууд холбогдоно.

Хиймэл оюун ухаан, цахим сургалттай холбоотой асуудлаар бид дуу хоолойгоо хүргэх юм. Манай бүлэгт орсон гишүүдийн ихэнх нь нийгмийн бодлого, хүний хөгжлийн байнгын хорооны, энэ салбарт ажилласан туршлагатай гишүүд. Бид туршлагаа нэгтгэн, судалгаанд үндэслэн Засгийн газарт чиглэл өгч ажиллана" гэв.

Ж.Галбадрах: УИХ дахь Боловсролыг дэмжих лобби бүлгийн ахалж ажиллана