УИХ жилийн өмнө Цацраг идэвхт бодисын талаар төрөөс баримтлах бодлого болон Цөмийн энергийн тухай хуулийг батлан гаргасан. Энэхүү бодлогын баримт бичиг болон хуулийн хэрэгжилт ямар байгааг эргэн харж, шаардлагатай бол хуульд нэмэлт, өөрчлөлт оруулах хэрэгтэй гэдэг байр суурьтай гишүүн цөөнгүй бий.

Тухайлбал, УИХ-ын гишүүн П.Алтангэрэл, Ц.Батбаяр, Я.Батсуурь, О.Чулуунбат нар ураны салбарынхантай уулзаж, санал бодлоо солилцох санал гаргажээ. Үүний дагуу дээрх нэр бүхий гишүүд Цөмийн энергийн агентлаг, "МонАтом" төрийн өмчит хувьцаат компани болон ураны салбарт үйл ажиллагаа явуулж байгаа компаниудын төлөөлөлтэй УИХ-ын гишүүд өчигдөр уулзлаа. Цөмийн энергийн тухай хууль амьдрал дээр хэрхэн хэрэгжиж байгаа болон хуулийг хэрэгжүүлэхэд гарч буй хүндрэлийн талаар уг салбарынхны санал бодлыг сонсохыг хүссэн гэдгээ УИХ-ын гишүүн П.Алтангэрэл уулзалтыг нээж хэлсэн үгэндээ онцлов.

Тэрээр дэлхий нийтээр цөмийн эрчим хүч, цацраг идэвхт ашигт малтмалын хэрэглээнд анхаарал хандуулж байгаа энэ үед ураны их нөөцтэй.

Монгол Улс энэ салбарын бодлогоо боловсронгуй болгож, алс хэтийг харсан төлөвлөлт хийх нь чухал байгааг онцлов.

Уулзалтад ураны ордод лиценз эзэмшдэг 14 компанийн төлөөлөгчид оролцсон юм. Тэд Цөмийн энергийн тухай хуулийн талаар өөрсдийн санал бодлоо хэлэв. Тухайлбал ураны салбарт гадаадын хөрөнгө оруулагчдыг татах асуудал хуульд бүрхэг байгаа, газрын гадаргын ховор элемент гэдэг нэр томъёонд багтдаг 14 элемент цацраг идэвхт бодис биш атал хуульд цацраг идэвхт бодис гэж тусгасан гээд учир дутаг-далтай зүйл олон байгааг мэргэжлийнхэн хэлж байлаа.

"МонАтом" төрийн өмчит хувьцаат компанийн захирал Р.Бадамдамдин, цацраг идэвхт ашигт малтмалыг хайх, олборлох, ашиглах хуулийн орчин гадаадын хөрөнгө оруулагчдад таатай бус байгааг дурдаад энэ салбарыг хөгжүүлье гэвэл төрийн оролцоог нэмэгдүүлэх бус харин хөрөнгө оруулагчдыг хэрхэн татах вэ гэдэг бодлогоо тодорхой болгох хэрэгтэй гэвХуульч Эрдэнэчимэг Цөмийн энергийн тухай хуульд цацраг идэвхт ашигт малтмалын ордод төрийн эзэмших хувь 34,51 хувь байхаар заасан нь үндэсний аюулгүй байдлыг хангах, хүн амыг цацраг идэвхт бодисын аюулаас хамгаалах зорилттой уялдахгүй байгааг шүүмжиллээ.

Түүнчлэн уран зэрэг цацраг идэвхт ашигт малтмалын ордуудад төрийн эзэмших хувь 34, 51 байх талаар хуульд тусгасан нь үндэсний аюулгүй байдал гэдгээр халхавчлан өмчийн эрхийг ноцтой зөрчиж байгааг тэрээр мөн онцоллоо. П.Алтангэрэл нарын нэр бүхий гишүүдийн санаачилсан энэ уулзалтаас ямар нэгэн шийдвэр гарахгүй ч Цөмийн энергийн тухай хуульд нэмэлт, өөрчлөлт оруулан илүү сайжруулахад салбарынхны үг хэрэгтэй гаж үзжээ.