ТОЙРГИЙНХОО 20 ИРГЭНД ГЭР ОЛГОВ

УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ өнгөрсөн долоо хоногт тойрогтоо ажиллажээ. Тэрбээр тойргийнхоо иргэдийн санал хүсэлтийг харгалзан үзсэний үндсэн дээр холбогдох хүмүүстэй зөвшилцсөний үндсэн дээр дүүргийнхээ орон гэргүй, хүнд өвчтэй, өндөр настнууддаа сар шинийн босгон дээр 20 иргэнд гэр олголоо. УИХ-ын гишүүн С.Эрдэнэтэй хамтран УИХ-ын гишүүн С.Одонтуяа, Баянгол дүүргийн Засаг дарга Д.Оросоо, Иргэдийн төлөөлөгчдийн хурлын дарга Д.Дэлгэрбат нар гэрийг хамтдаа гардуулан өгсөн юм. Дээрх албаны хүмүүст иргэдийн зүгээс гэр хүссэн өргөдөл хамгийн их ирдэг аж. Тиймээс энэ удаад ирсэн өргөдлүүдээ судалж үзээд амьдралын боломж муутай, хүнд өвчтэй, харж хандах үр хүүхэдгүй гэх мэт хүндэтгэх шалтгаантай 20 иргэнд ийнхүү монгол гэр өгсөн байна. Энэ үеэр өргөдлийнх нь хариуг нааштайгаар хүлээн авч өмнө нь тулгамдсан асуудлыг шийдэж өгсөн УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ болон түүнийг дагалдаж яваа хүмүүст талархлын үгээ дамжуулж, сэтгэл зүрхнээсээ хүндэтгэж байсан юм.

УТААГҮЙ ТҮЛШНИЙ НЭЭЛТТЭЙ ӨДӨРЛӨГИЙГ НЭЭЛЭЭ

Үүнээс гадна УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ Баянгол дүүрэгт зохион байгуулсан утаагүй түлшний нээлттэй өдөрлөгийн нээлтэд оролцжээ. Тэрбээр энэ үеэр "Баянгол дүүрэг бол агаарын бохирдлыг бууруулах нэгдүгээр бүс. Тиймээс эхний алхам болгож тус дүүргийн гэр хорооллын өрхүүдииг түүхий нүүрс хэрэглэхийг хориглож, зөвхөн хагас коксжсон,боловсруулсан түлш түлэх бүс болгон өнгөрсөн онд зарласан билээ. Гэвч тендер оройтож зарлагдсан, тээвэрлэлт гацсан зэрэг хариуцлагагүй албан хаагчдаас болж иргэд өнөөдрийг хүртэл түүхий нүүрс түлсээр байна.

Баянгол дүүргийн гэр хорооллын есөн хороонд нийт 12461 өрх амьдардаг.

Мөн тус дүүрэг нь журмаараа түүхий нүүрс түлэхийг хориглосон бүс бөгөөд Баянгол дүүрэгт жилдээ 34 мянган тонн боловсруулсан түлш хэрэглэх шаардлагатай. Гэвч бодит байдал дээр ердөө 3000 тонн нүүрс нийлүүлээд байгаа ба буруу менежментээс болж энэ мэтээр агаарын бохирдол төдийлөн сайн буурахгүй байна. Тиймээс Баянгол дүүргийн шинэ удирдлагууд санаачлан эрчим хүчний хэмнэлттэй, бүрэн шаталттай зуухны бүсэд дүүргээ хамрууллаа. Энэ шийдвэрийг өнгөрсөн долоо хоногт Байгаль орчин, ногоон хөгжлийн сайд С.Оюун, Хотын дарга Э.Бат-Үүл нар гаргаад байгаа юм. Тиймээс Баянгол дүүрэг цаашид хагас коксжсон боловсруулсан түлш хэрэглэхээс гадна эрчим хүчний хэмнэлттэй, бүрэн шаталттай зуухны хосолмол бүс боллоо гэсэн үг. Тиймээс бид, хаана хаанаа хичээх хэрэгтэй" хэмээсэн юм. Нээлттэй өдөрлөгт оролцсон иргэд түүний саналыг дэмжиж байсан бөгөөд утаагүй түлшээр хангах асуудлыг бүрэн шийдэж өгөхийг хүсэж байсан юм.

Баянгол дүүргийг утаагүй бүс болсонтой холбогдуулан дүүргийн Засаг даргын Тамгын газар санаачлан Агаарын бохирдлыг бууруулах үндэсний хороо, Засгийн газрын тусгай сан Цэвэр агаарын сан, Нийслэлийн агаарын чанарын албатай хамтран нээлттэй өдөрлөг зохионн байгуулсан юм. Энэ өдөр эрчим хүчний хэмнэлттэй бүрэн  шаталттай зуухыг худалдах ба хэрхэн ашиглах, мөн цаашлаад энэ нь агаарын бохирдлыг бууруулахад ямар ач тустай талаар иргэдэд мэдээлэл хүргэлээ.

Баянгол дүүргийн шинэ удирдлагуудын санаачилгаар гэр хорооллын өрхүүдэд 12 мянга гаруй утаагүй зуух тараахаар бэлэн болсон ба уг зуухны зах зээлийн үнэ 400-500 мянган төгрөгийн үнэтэй боловч энэ удаад иргэдэд 30-70 мянган төгрөгөөр иргэдэд олгогдох ажээ. Өрх бүр энэхүү зуухыг хэрэглэхээс гадна хагас коксжсон боловсруулсан түлшний нийлүүлэлт хэвийн болчихвол Баянгол дүүрэг агаарын бохирдлыг бууруулах хосолмол бүс болсны үр дүн гарах юм. Баянгол дүүргийн удирдлагууд боловсруулсан түлшийг иргэдэд саадгүй хүргэхийг холбогдох байгууллагаас эрчимтэй шаардсаар байгааг энд мөн дурьдах хэрэгтэй биз ээ.