Хүн амын хөгжил, нийгмийн хамгааллын яамнаас өнгөрсөн пүрэв, баасан гарагт “Ахмад настны хөгжил хамгааллын шинэчлэлийн бодлого” үндэсний зөвлөлгөөнийг Дархан хотноо амжилттай зохион байгууллаа. Амжилттай гэж хэлсний учир нь энэхүү зөвлөлгөөн бусад уулзалт, зөвлөлгөөнөөс хэд, хэдэн онцлог, давуу талтай болсон шиг санагдсанд байгаа юм. Урьд нь ийм хэмжээний үндэсний зөвлөлгөөнийг Улаанбаатараас өөр хотод хийж байсан тохиолдол байхгүй. Харин шинэчлэлийн Засгийн газрын Хүн амын хөгжил, нийгмийн хамгааллын яамныхан дээрх уламжлалыг эвдэж, 21 аймаг, есөн дүүргийн 300 орчим ахмад настанг Дархан хотод урин залж чадлаа.

УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ яамныхаа харьяа газрын дарга нараас гадна Төрийн нарийн бичгийн дарга Б.Отгонжаргал, УИХ-ын гишүүн С.Ганбаатар,  Нийгмийн бодлого, боловсрол, соёл, шинжлэх ухааны байнгын хорооны дарга З.Баянсэлэнгэ, Монгол Улсын Ерөн­хийлөгч, УИХ-ын дарга, Ерөнхий сайдын зөвлөхүүд болон НҮБ-ын төлөөлөгчийг хүртэл урьсан байсан нь энэхүү зөвлөлгөөнд ямар их ач холбогдол өгснийг нь илтгэх биз.

Зөвлөлгөөн Дархан хотын “Залуучууд” театрт болсон бөгөөд хүрэлцэн ирсэн ахмадуудын зарим нь өөрсдийн эрхэлдэг бизнесээ бусдадаа болон албаны хүмүүст танилцуулсан юм. Тэд ихэвчлэн эсгий, төрөл бүрийн шүр, сувдаар бүтээгдэхүүн үйлдвэрлэдэг аж. Тэдэн дундаас хүмүүсийн анхаарлыг хамгийн ихээр татаж байсан бүтээгдэхүүн нь бөхчүүдийн дүрс бүхий модон сийлбэр байв. Энэхүү сийлбэрүүдийг урласан хүнийг Ц.Төмөр гэдэг. Хуульч мэргэжилтэй ахмад дайчин хэдий ч сийлбэр хийх сонирхолдоо хөтлөгдөн олон арван бүтээл урлажээ. Түүний сийлбэрүүдийн гол дүр нь ихэвчлэн бөхчүүд бай­даг аж. Тийм болохоор ч тэр үү, Ерөнхий сайдын зөвлөх Кёкүшюзан Д.Батбаяр түүний бүтээлүүдийг амтархан сонирхож харагдсан. Бүтээлээ олонд сонирхуулж байсан ахмадууд маань “Өтөллөө гээд хэн нэгний гарыг хараад суухын оронд ингээд өөрсдийгөө болгож суух нь бидэнд илүү их боломжийг олгодог. Энэ бүх боломжийг маань улам өргөжүүлж өгөх юм бол бид илүү хичээж ажиллах боломжтой. Хойч үедээ ч хэлж, ярих зүйл их байх юм байна” хэмээж байсан юм.

“Ахмадууд та бүхэн бидний ачтанууд

Ахмадууд та бүхэн бидний гавъяатнууд

Ахмадууд та бүхэндээ бид хайртай

Амхадууд та бүхнийгээ бид үргэлж хайрлаж, хүндэтгэж явна” хэмээн Дархан хотын хүүхэд багачуудын төлөөлөл хуран чуулсан ахмад буурлуудаа хүндэтгэн, тангараг уншиж өгснөөр зөвлөгөөн албан ёсоор эхэлсэн юм. Улаан бүч, малгайгаар ижилссэн хүүхдүүдийн хүндэтгэлийг хүлээсэн ахмад буурлуудын зарим нь нулимсаа арчиж, зарим нь нүүрэндээ инээмсэглэл тодруулж суулаа. Ийнхүү хүүх­дүүдийн төлөөлөл тангаргаа уншиж дууссаныхаа дараа Хүн амын хөгжил, нийгмийн хамгааллын сайд С.Эрдэнэд  гардуулж өгсөн юм. Үүний дараа Монгол Улсын Ерөнхийлөгч, УИХ-ын дарга, Ерөнхий сайд нарын ахмадуудад илгээсэн мэндчилгээг зөвлөхүүд нь уншиж танилцуусан нь танхимд сууж байсан ахмадуудыг улам огшоож харагдсан.

Үүний дараа холбогдох албаны хүмүүс ахмадуудын төлөө ямар үйл ажиллагаа хийхээр төлөвлөж байгаагаа илтгэл хэлбэрээр танилцуусан юм. Зөвлөлгөөний гол зорилго нь Хүн амын хөгжлийн цогц бодлогын баримт бичигт ахмад настнуудын талаар авах төрийн бодлогыг хэрхэн тусгах талаар чиглэл, зөвлөмж гаргах гэдгийг энэ үеэр Хүн амын хөгжил, нийгмийн хамгааллын сайд С.Эрдэнэ танилцуулсан. Мөн ахмад настны хөдөлмөр эрхлэлтийг дэмжих тухай хуулийн төслийг санаачлан, боловсруулж байгаа бөгөөд энэ хуулийн төсөлд ахмадуудын санаа бодлыг тусгах нэг арга нь ч энэхүү зөвлөлгөөн гэдгийг дурьдаж байлаа. Энэхүү зөвлөлгөөний бас нэг онцлог нь дан ганц дарга нар ярих биш харилцан ярилаж байсанд оршино. Ахмадуудын асуусан асуултад холбогдох албаны хүмүүс дор бүр нь хариу өгч байсан ч цаг хугацаанд хавчигдсаны улмаас хариулж амжаагүй маш олон асуулт үлдсэн юм.

Хариултаа авч чадаагүй үлдсэн 100 гаруй ахмадад заавал хариу өгнө гэдгээ С.Эрдэнэ сайд энэ үеэр хариуцлагатайгаар мэдэгдсэн бөгөөд бүгдийнх нь асуултыг тэмдэглэж авсан гэдгийг онцолж байсан.

Харин ахмадууд энэхүү зөвлөл­гөөнийг зохион байгуулж байгаад талархалтай хандаж байсан бөгөөд ахмад настнуудын асуудлыг ийнхүү анхаарч эхэлсэнд талархаж байгаагаа дуулгаж  байсан.

Зөвлөлгөөнөөс Засгийн газар болон ахмадуудын төлөө үйл ажиллагаа явуулдаг Төрийн бус байгууллагууд, Хэвлэл мэдээл­лийн байгууллагуудад хандсан зөвлөмжийг гаргасан бөгөөд Засгийн газарт ахмадуудын насжилтын асуудлыг уртасгах тал дээр анхаарахыг зөвлөсөн. Харин Төрийн бус байгууллага болон Хэвлэл мэдээллийн байгууллагуудад нийгмийн хариуцлагаа хэрэгжүүлэх үүднээс ахмадуудад тусгайлан цаг гаргахыг уриалсан юм.

Хүн амын хөгжил, нийгмийн хамгааллын яамнаас Хүн амын хөгжлийн цогц бодлогын баримт бичигийг боловсруулахаар бэлтгэж байгаа юм. Энэ хүрээнд хүн амаа ахмад настан, хөгжлийн бэрхшээлтэй иргэд, хүүхэд, залуус, эмэгтэйчүүд гэсэн хэсэгт хувааж, тулгамдаж буй асуудал, хүсэж, хүлээж буй бүхнийг нь сонсох үүднээс үндэсний хэмжээний зөвлөгөөнүүдийг зохион байгуулж байгаа юм. Энэхүү цуврал зөвлөгөөний дараагийнх нь эмэгтэйчүүдийнх аж.