Угсаа гарал нэгтэй МАН, МАХН- ынхан “Эх орончдын өдөр”-ийг сүр дуулиантай тэмдэглэн өнгөрүүлэв. Хоёр намын төлөөлөл хамтдаа Их жанжин Сүхбаатарын хөшөөнд цэцэг өргөж, эзэн Чингис хаанд хүндэтгэл үзүүлсэн юм.

Уг арга хэмжээнд МАН-ын Удирдах зөвлөлийн гишүүд, дэмжигчдээс нь гадна МАХН-ынхан оролцсон бөгөөд намуудын тугийг зэрэгцүүлэн мандуулсан нь тун ч анхаарал татсан үйл явдал байлаа. Учир нь тэдний гаргасан энэ үйлдлийг хоёр намын эвсэх нэгдэх тухай яриаг баталсан үйлдэл хэмээн олон нийт харсан юм. Гэтэл тэд өмнө нь “Эх орончдын өдөр”-ийг булаацалдаж Сүхбаатарын хөшөөг хэн нь өмчлөхдөө тулж маргалдаж байсан түүхтэй. Харин энэ удаад хэн хэн нь хэтийг харж, хоёрыг эргэцүүлсэн бололтой Их жанжны хөшөөнд хамтдаа хүндэтгэл үзүүлсэн. Улс төрийн өнөөгийн нөхцөл байдалд МАХН давуу эрхтэй, толгой дээгүүр байх болсон. МАН ч МАХН-тай эвсэх хүсэлтэйгээ удаа дараа илэрхийлсэн. Голын хоёр эрэгт аятай байсан хоёр намын туг хамтдаа мандсан тухай удирдлагууд хуучны МАХН, одоогийн МАН-ын аль нэгнийх нь баяр бус Монголын ард түмний баяр гэсэн тайлбар хийж байв. Мөн МАН нь МАХН-аар хязгаарлагдахгүй Монголын улс төрийн бүх намуудад нээлттэй. Гэхдээ МАН, МАХН гэдэг улс төрийн нам ард түмнээ гэсэн үзэлд нэгдэж ажиллах ёстой. Үүний илрэл нь “Эх орончдын өдрөөр харагдаж байгаа” гэв.

МАН-ын дарга Ө.Энхтүвшин ганцаараа монгол дээлээр гоёж ирсэн нь тун ч өвөрмөц харагдаж байв.

Сүхбаатарын хөшөөнд цэцэг өргөх ёслолд МАН-ын дарга Ө.Энхтүвшин ганцаараа монгол дээлээр гоёж ирсэн нь тун ч өвөрмөц харагдаж байв. Түүнээс өөр намынхаа түүхт ойн өдрөөр үндэснийхээ хувцсаар гангарсан төрийн түшээ байгаагүй юм. Тэдний баярыг чимж харагдсан залуу дуучин А.Хаянхярваа байв. Тэрбээр намын залуу гишүүдийн нэг бөгөөд үеийн залуустайгаа мөр зэрэгцэн алхаж байсан нь олны нүдийг хужирласан.

Баярын арга хэмжээ МАН-ын түүхт 92 жилийн ой, “Эх орончдын өдөр”-т зориулсан эрдэм шинжилгээний бага хурлаар эхэлсэн. Энэ үеэр МҮАН-ын дарга М.Энхсайхан “Эдийн засгийн аюулгүй байдал ба төмөр зам” сэдэвт илтгэл тавьсан юм. Тухайлбал, төмөр замын царигийн асуудлыг хөндөж, манай улсад үр өгөөжгүй төсөл олон байгааг онцолсон. Мөн улс орны хөгжилд чухал үүрэгтэй төмөр замын асуудалд хэт улстөржсөн байдлаар хандаж болохгүйг ч илтгэлдээ дурдсан. Тэрбээр мөн Тавантолгой Гашуунсухайтын чиглэлд тавих 775 сая ам.долларын өртгөөр хэрэгжих төмөр замын ашигтай төсөл байгааг танилцуулсан юм. Энэхүү илтгэлээрээ МҮАН ч улс төрийн ууган хүчний баярыг хамтдаа хуваалцаж буйгаа харуулсан. 92 жилийн ойн хүрээнд болсон дараагийн арга хэмжээ бол үндэсний бөхийн барилдаан бөгөөд МАН-ын дарга Ө.Энхтүвшин, УИХ-ын гишүүн Б.Бат-Эрдэнэ, Нийслэлийн МАН-ын дарга Ц.Сандуй нарын олон хүн үзэж сонирхсон. Түүнчлэн эл өдөр МАХН-ынхан зарим хүмүүсээ урамшуулсан юм. Тодруулбал, МАХН-МҮАН-ын “Шударга ёс” эвсэл бүлгийн гишүүн, НИТХ-ын төлөөлөгч Л.Шагдаррагчааг Нийслэлийн хүндэт тэмдэг, эвслийн бүлгийн дарга, НИТХ- ын төлөөлөгч Н.Баяраа, С.Ононбаяр, ажлын албаны дарга П.Гансүх нарыг Нийслэлийн хүндэт өргөмжлөл, мөнгөн шагналаар шагнасан юм.