Монгол Улс НҮБ-ийн Эдийн засаг, нийгмийн зөвлөлийн “Эмэгтэйчүүдийн аж байдлын комисс”- ын гишүүнээр 2011 оноос хойш сонгогдон ажиллаж байгаа билээ. Уг комиссын 57-р чуулган “Охид, эмэгтэйчүүдийн эсрэг хүчирхийллээс урьдчилан сэргийлэх, хүчирхийллийг эцэс болгох тухай” сэдвийн дор өчигдөр АНУ-ын Нью-Йорк хотноо эхэлжээ. Чуулган энэ оны 3-р сарын 4-15-ны өдрүүдэд болох юм.

Олон улсын түвшинд эмэгтэйчүүдийн эсрэг хүчирхийлэлтэй тэмцэх асуудал хурцаар тавигдаж, гишүүн орнууд тодорхой амлалт авч энэ чиглэлээр хүчин чармайлт гарган ажиллаж байгаа бөгөөд манай улсын хувьд ч энэ асуудалд онцгойлон анхаарал хандуулах шаардлагатай байгааг харгалзан “Эмэгтэйчүүдийн аж байдлын комисс”- ын 57-р чуулганд Хүн амын хөгжил, нийгмийн хамгаалалын сайд С.Эрдэнэ тэргүүтэй төлөөлөгчид оролцож байна.

Манай төлөөлөгчид тус чуулганы нэгдсэн хэлэлцүүлэгүүд болон охид, эмэгтэйчүүдийн эсрэг бүх төрлийн хүчирхийллийг арилгах, тэдгээрээс урьдчилан сэргийлэх сэдэвт дээд хэмжээний дугуй ширээний уулзалт ярилцлагад идэвхитэй оролцож, хэлэлцүүлж буй асуудлуудаар байр сууриа илэрхийлж байна. . Тухайлбал, Бээжингийн Үйл Ажиллагааны төлөвлөгөө ба Ерөнхий ассемблейн 23 дугаар Тусгай чуулганы үр дүнгийн хэрэгжилтийн хэлэлцүүлэгт оролцож, Үйл Ажиллагааны Төлөвлөгөө болон Мянганы хөгжлийн зорилтод тусгагдсан охид, эмэгтэйчүүдийн талаарх зорилтуудыг хэрэгжүүлэх явцад гарсан ололт амжилт; тулгарч буй саад бэрхшээлүүд болон 2015 оноос хойшхи хөгжлийн хөтөлбөрт тусгагдах хүйсийн тэгш байдлын гол асуудлуудаарх хэлэлцүүлгүүдэд оролцож, санал солилцоно.

Түүнчлэн, ДОХ/ХДХВ-ын асуудалд анхаарлаа хандуулж, Эмэгтэйчүүдийн аж байдлын хорооны “Эрэгтэй, эмэгтэй хүний үүрэг хариуцлагын эрх тэгш хувиарлалт” сэдвийн дор явагдсан 53-р чуулганаас гарсан дүгнэлтийн хэрэгжилтийн явцад үнэлгээ, дүгнэлт хийхэд болон 57-р чуулганы тайланг баталж, 58-р чуулганаар хэлэлцэх асуудлын урьдчилсан төлөвлөгөөг хэлэлцэхэд оролцож, байр сууриа илэрхийлж байгаа юм.

ХАХНХ-ын сайд С.Эрдэнэ чуулганы нэгдсэн хуралдаанд Охид, эмэгтэйчүүдийн эсрэг бүх төрлийн хүчирхийллийг арилгах, тэдгээрээс урьдчилан сэргийлэх талаар Монгол Улсын Засгийн газраас баримталж буй бодлого, авч хэрэгжүүлж буй арга хэмжээнүүдийн талаар тодорхой мэдээлэл бүхий үг хэлнэ.

Чуулганд оролцсоны дараагаар уг чуулганаас гаргах шийдвэрийг хэрэгжүүлэх, арга хэмжээний нэгдсэн төлөвлөгөөг ХЗЯ, ЭМЯ, ЖТБҮХ, холбогдох бусад төрийн ба төрийн бус байгууллагуудтай хамтран боловсруулж, хэрэгжилтийг зохион байгуулна. Улмаар чуулганаас гаргасан бодлого, шийдвэрийг Монгол Улсын төрөөс баримтлах “Хүн амын хөгжлийн цогц бодлого”-д тусган хэрэгжүүлэх юм.

НҮБ-ын Эдийн засаг, нийгмийн зөвлөлийн Эмэгтэйчүүдийн аж байдлын комиссын 57 дугаар чуулганд оролцох нь охид, эмэгтэйчүүдийг хүчирхийллээс урьдчилан сэргийлэх, таслан зогсоох чиглэлээр үндэсний хэмжээнд хэрэгжүүлсэн үйл ажиллагаа, туршлагаа дэлхийн бусад улс орнуудтай хуваалцах, олон улсын чиг хандлагад нийцүүлэн үйл ажиллагаагаа чиглүүлэх, хамтран ажиллах чиглэлээ тогтооход чухал ач холбогдолтой юм.

Хүн амын хөгжил, нийгмийн хамгааллын яам уг уулзалтаар хэлэлцэх асуудлын хүрээнд салбар дундын уялдааг хангах чиглэлээр бэлтгэл ажлыг хангуулж байна. Уг чуулганд Хүн амын хөгжил, нийгмийн хамгааллын сайд С.Эрдэнэ , Хүүхдийн төлөө Үндэсний газрын дарга Ишбадамын Нарантуяа , Хүн амын хөгжил, нийгмийн хамгааллын яамны Гадаад хамтын ажиллагааны хэлтсийн дарга Цоодолын Болормаа , Хүн амын хөгжил, нийгмийн хамгааллын яамны Гэр бүл, эмэгтэйчүүдийн хөгжлийн хэлтсийн дарга Долгорсүрэнгийн Мөнхчулуун болон Гадаад харилцааны яамны Олон улсын байгууллагын газрын дэд захирал Вангансүрэнгийн Өлзийбаяр нар оролцож байгаа юм.

С.Эрдэнэ сайд "Эмэгтэйчүүдийн аж байдлын комисс"-ын чуулганд оролцож байна