Улсын Их Хурлын Хууль зүйн байнгын хорооны хуралдаан 2013 оны 10 дугаар сарын 15-ны өдөр Төрийн ордны “В” танхимд хуралдав. Хуралдааныг Хууль зүйн байнгын хорооны дарга Ш.Түвдэндорж удирдаж, байнгын хороогоор хэлэлцэх асуудлыг танилцуулав.

Байнгын хорооны энэ өдрийн хуралдаанаар:

-Эрүүгийн байцаан шийтгэх хуулийн 334 дүгээр зүйлийн 334.4 дэх хэсгийн зарим заалт Үндсэн хуулийн холбогдох заалтыг зөрчсөн эсэх тухай маргааныг хянан шийдвэрлэсэн тухай Үндсэн хуулийн цэцийн 2013 оны 10 дугаар сарын 09-ний өдрийн 03 дугаар дүгнэлт;

Хуралдаанаар Эрүүгийн байцаан шийтгэх тухай хуулийн 334 дүгээр зүйлийн 334.4 дэх хэсэгт “Хорих ял эдлэхээс хугацааны өмнө тэнсэн суллах, ялаас чөлөөлөх тухай захирамжид давж заалдах гомдол гаргаж болохгүй бөгөөд харин прокурор эсэргүүцэл бичиж болно.”

гэж заасны “...давж заалдах гомдол гаргаж болохгүй...” гэсэн заалт нь Монгол Улсын Үндсэн хуулийн Арван зургадугаар зүйлийн 14 дэх заалтын “... шүүхийн шийдвэрийг давж заалдах ... эрхтэй. ...” гэснийг зөрчсөн байна гэсэн Yндсэн хуулийн цэцийн 2013 оны 03 дугаар дүгнэлтийг хэлэлцлээ.

Гишүүдийн олонхи нь Үндсэн хуулийн цэцийн гишүүн нь ирж танилцуулах шаардлагатай гэж үзэн хуралдааныг хойшлуулав.

Үндсэн хуулийн цэцийн дүгнэлтийн талаар Улсын Их Хурлын гишүүн Р.Гончигдорж, С.Баярцогт, Х.Тэмүүжин, Ц.Оюунбаатар, Д.Оюунхорол, С.Эрдэнэ, Ж.Батзандан, Ө.Энхтүвшин, Р.Бурмаа нар асуулт асууж, үг хэллээ.

Байнгын хорооны хуралдаанд ажлын хэсгээс Улсын дээд шүүхийн Эрүүгийн танхимын шүүгч С.Нямжав, Улсын ерөнхий прокурорын орлогч, төрийн хууль цаазын шадар зөвлөх Г.Эрдэнэбат нар байлцав.

Үндсэн хуулийн цэцийн дүгнэлтийг хэлэлцэх үед Байнгын хорооны хуралдаанд оролцсон гишүүдийн олонхи нь Үндсэн хуулийн цэцийн гишүүн нь ирж танилцуулах шаардлагатай гэж үзэн хуралдааныг хойшлуулахаар болов.

Байнгын хороо Өршөөлийн тухай хуулийг хойшлууллаа