УИХ-ын чуулганы нэгдсэн хуралдаанаар 2013 оны Төсвийн тодотголын тухай хуулийн төслийг хэлэлцэж байна. Хуулийн төсөлтэй холбоотой гишүүдийн сонирхсон асуултад сайд нар хариулт өгч байгаа юм.

УИХ-ын гишүүн М.Энхболд: -Үнэ тогтворжуулах хөтөлбөрийн хүрээнд хийгдсэн арга хэмжээ үр дүнгээ өгч байна уу. Цементийн үнэ нэмэгдсэнд, хөрөнгө оруулалт, орлого тасалдсанд хэн хариуцлага хүлээх вэ?

Ерөнхий сайд Н.Алтанхуяг: -Үнэ тогтворжуулах хөтөлбөр дийлэнхдээ амжилттай хэрэгжсэн. Ерөнхий дүнгээрээ Засгийн газар, Монголбанк компаниудад мөнгө өгч байгаа хэрэг бус,

аж ахуйн нэгжүүдэд арилжааны банкаар дамжуулж зээл олгож, нийлүүлэлтийг нэмэгдүүлсэн хэрэг. Өнгөрсөн жил махны нийлүүлэлт дээр 87 тэрбум төгрөгийн хөнгөлөлттэй зээл гараад буцаад төлөгдсөн.

Н.Алтанхуяг: Цаашид бид хөтөлбөрт хамрагдаж, үнэ бууруулна гэж орчихоод авсан мөнгөө зориулалтын бусаар зарцуулсан байгааг ил тод зарлана

Цементийн үнэ дээр өнгөрсөн тавдугаар сард дэвшил бий. Бүтэн таван сар үнэ нь тогтвортой байж байгаад сүүлийн нэг сард өөрчлөлт орлоо. Цаашдаа бид хөтөлбөрт хамрагдаж, үнэ бууруулна гэж орчихоод авсан мөнгөө зориулалтын бусаар зарцуулсан байгааг ил тод зарлана.

Цементийн үнийг тогтворжуулна гэж хөтөлбөрт хамрагдсан компаниудыг шалгах ажлын хэсэг гаргалаа. Хөрөнгө оруулалт 400 орчим тэрбум төгрөгөөр тасраад байгаа. Гэхдээ бид нийт дүнгээр тооцвол түүхэнд байгаагүй их хэмжээний хөрөнгө оруулалт хийсэн.

Эдийн засгийн хөгжлийн яамны Стратеги төлөвлөлтийн газрын орлогч дарга н.Батхүрэл: -Тендер нь зарлагдаагүй, гэрээ нь байгуулагдаагүйгээс хөрөнгө оруулалт тасалдсан. Төсвийн орлогоос хамаараад хөрөнгө оруулалт багассан тал бий. Хасагдаж байгаа объектуудын хувьд зам, барилгын ажил дээр Чингис бондын санхүүжилтээр солигдож байгаа.

Шадар сайд Д.Тэрбишдагва: -Төсвийн хөрөнгө оруулалтаар улсын болон орон нутгийн хэмжээнд 2400 орчим арга хэмжээ хийж байна. Зураг төсөв дээр мөнгө суулгахдаа харилцан адилгүй гарчээ. 64 зураг төсөвгүй төсөл ч байгаа.

630 орчим тэрбум төгрөгөөр улсын төсвийг санхүүжүүлсэн.

Орон нутагт мөнгө суулгаж, юм хийх гэж байгаа дүр үзүүлэхээ болих хэрэгтэй. Худалдан авах ажиллагаа 394 төсөл дээр хийгдсэн. Цаашдаа цахим худалдан авалтыг эрчимжүүлнэ. 2400 гаруй тендерээс 394 төсөл дээр зарласан.

Сангийн сайд Ч.Улаан: -630 орчим тэрбум төгрөгөөр улсын төсвийг санхүүжүүлсэн. Санхүүжилтээс ажил тасраагүй. Төсвийн орлого тасалдах янзтай байна. Импорт, экспорт, Оюутолгойн гэрээнээс нийтдээ нэг их наяд төгрөг тасалдлаа.

Үлдсэн хугацаанд 200 гаруй тэрбум төгрөгийн орлогыг нөөц бололцоогоо дайчлан бүрдүүлэхээр ажиллаж байгаа. Холбогдох хариуцлагыг тооцож байгаа шүү.

Ч.Улаан: Санхүүжилтээс ажил тасраагүй