Их эзэн Чингис хааны мэндэлсэн “Монгол бахархал”-ын өдрөөр Монгол Улсын Шадар сайд Д.Тэрбишдагва “Гудамж” төслийн хүрээнд нийслэлийн хэмжээнд хийж гүйцэтгэсэн бүтээн байгуулалтын ажлуудтай биечлэн танилцсан юм.

ЭЗХЯ-аас санаачлан өнгөрсөн хавраас эхлэн хэрэгжүүлж буй “Гудамж” төслийн зорилго нь автозамын түгжрэлийг багасгаж, агаарын бохирдлыг бууруулж, газар ашиглалтыг сайжруулж нийгэмд ажиллаж, амьдрах таатай орчныг бүрдүүлэх явдал юм. Төслийн хүрээнд автозамын 33 уулзварыг өргөтгөн шинэчлэхээр төлөвлөснөөс 18 уулзварыг нь ашиглалтад оруулаад байна.

Шадар сайд Д.Тэрбишдагва: Бидний нүдэнд харагдаж, гарт баригдахуйц бүтээн байгуулалтыг хийсэн залуучуудаараа бид бахархах ёстой.

Нийслэлийн бүтээн байгуулалтын ажилтай танилцах үеэр Шадар сайд Д.Тэрбишдагва Монгол хүнд хийе бүтээе гэсэн сэтгэл байвал чадахгүй бүтээхгүй зүйл байдаггүйг бэлхнээ харуулж байгаа нь үнэхээр Монголын бахархал юм. Бидний нүдэнд харагдаж, гарт баригдахуйц бүтээн байгуулалтыг хийсэн залуучуудаараа бид бахархах ёстой.

Өнөөдөр Монгол бахархлын баярын өдөр гээд бүх нийтээрээ амарч байгаа хэдий ч зам барилгын ажил дээр олон залуус хүйтнээс өмнө ажлаа дуусгах гэж цаг нартай уралдан хөдөлмөрлөж байна. Шинэчлэлийн Засгийн газар ажил хийж бүтээж буй хүн бүрийг дэмжин ажиллах болно гэсэн юм.

Нийт 18 уулзварыг өргөтгөн шинэчлэх ажилд үндэсний 58 аж ахуйн нэгж байгууллага оролцож 5000 гаруй хүнийг ажлын байраар хангасан байна. Шадар сайдыг дагалдан “Гудамж” төслийн удирдлага, инженер техникийн ажилтнууд дээрхи байршлуудад газар дээр нь очиж танилцахын зэрэгцээ иргэд болон зорчигчдын санал бодлыг сонссон юм.

18 уулзварыг өргөтгөн шинэчлэхэд 58 ААН оролцож 5000 гаруй хүнийг ажлын байраар хангажээ.

Энэ үеэр нийслэл хотын баруун болон хойд захын алслагдсан гэр хорооллын иргэд бидэнд нэн шаардлагатай авто замуудыг барьж, амьдрах орчин нөхцөлийг сайжруулах, хотын үйлчилгээг хүртэх боломжийг нэмэгдүүлэх тал дээр анхааран ажиллаж байгаад талархаж байгаагаа ч хэлж байлаа.

Төслийн хүрээнд Чингисийн өргөн чөлөөний 2.2 км автозамын зорчих хэсгийг 2-3 дахин өргөсгөж, нэвтрүүлэх чадварыг нэмэгдүүлсний зэрэгцээ “Монос”-ын уулзвараас Нисэх-Яармаг чиглэлийн 5.5 км замыг мөн хоёр дахин өргөтгөх ажлыг эхлүүлээд байна.

Төслийн хүрээнд автозамын 33 уулзварыг өргөтгөн шинэчлэхээр төлөвлөснөөс 18 уулзварыг нь ашиглалтад оруулжээ.

Тухайлбал, Сонгино хайрхан дүүргийн нутаг дэвсгэрт нэгдүгээр хорооллын арын замыг 21 дүгээр хорооллын замтай холбох, Толгойт, Бага Наран чиглэлд шинээр авто замууд барихаар төлөвлөөд байгаа аж. Ийнхүү төслийн хүрээнд автозамын уулзваруудыг хөдөлгөөний зөв зохион байгуулалттай болгож өргөтгөн шинэчилснээр зөвхөн замын нэвтрүүлэх чадвар сайжраад зогсохгүй нийгэм-эдийн засгийн олон талт үр өгөөжөө өгч эхэлжээ.

Тухайлбал “Өргөө” кинотеатрын өмнөх уулзварын зам барилгын ажилд 1.6 тэрбум зарцуулсан бол ганцхан жилийн дотор 1.8 тэрбум төгрөгийн үр өгөөж буюу эдийн засгийн хэмнэлт гарна гэсэн тооцоог төслийн багийнхан гаргаад байна. Ер нь ашиглалтад орсон нийт 18 уулзварын зөвхөн нэгээс нь л гэхэд жилд 1.3-1.5 тэрбум төгрөгийн хэмнэлт гарах аж.

Монголчууд ажил үйлсээрээ бахархах хэрэгтэй