Уул уурхайн сайд Д.Ганхуягийн тушаалаар нүүрсний олон улсын жишигт нийцсэн ангилал, стандартын санал боловсруулах Ажлын хэсэг байгуулжээ.

Ангилал, стандартын саналыг боловсруулахдаа нүүрсний чанар, баяжуулалтын түвшинг нь нарийвчлан судлах аж. Манай улс дэлхийн зах зээлд олон жил нүүрс экспортолж буй ч өдийг хүртэл ангилал, стандартгүй явж ирсэн төдийгүй илчлэгийнх нь хэмжээг харгалзан үнийг нь тогтоож иржээ.

Коксжих нүүрсний стандартыг боловсруулахдаа илчлэгээс нь илүү чанарыг гол үзүүлэлт болгох нь зүйтэй гэж экспортлогчид үздэг. Ажлын хэсгийнхэн одоогийн байдлаар нүүрсний уурхайнуудаар явж судалгаа хийж буй гэнэ.

Тус Ажлын хэсгийг Уул уурхайн яамны Стратегийн бодлого, төлөвлөлтийн газрын Түлшний бодлогын хэлтсийн дарга А.Эрдэнэпүрэв ахалж байгаа бол хувийн хэвшлээс “Энержи ресурс”, МАК, “Багануур”, “Шарын гол” компанийн төлөөлөл багтжээ.