Монгол Улсын Технологийн дээд сургууль зохицуулах үйлчилгээтэй сүү, сүүн бүтээгдэхүүн боловсруулах үйлдвэртэй боллоо. Үйлдвэрийн нээлт өчигдөр болсон.

Нээлтийн ёслолд Шадар сайд Д.Тэрбишдагва, Үйлдвэр, хөдөө аж ахуйн дэд сайд Ц.Туваан, Технологийн дээд сургуулийн ерөнхий захирал Б.Барамсай болон Технологийн дээд сургуулийн багш, оюутнууд оролцсон юм. Сүүлийн жилүүдэд хүмүүс эрүүл мэнддээ анхаарч зохицуулах үйлчилгээтэй бүтээгдэхүүнийг ихээр хэрэглэх болжээ. Харин энэ хэрэгцээний 60 гаруй хувийг нь сүү, сүүн бүтээгдэхүүнээр хангадаг байна.

Энэхүү үйлдвэр нь сүү халаах, боловсруулах, хорхой ааруул хатаах зэрэг тоног төхөөрөмжүүдийг шинээр оруулж ирсэн бөгөөд хэрэглэгчдээ эрүүл чанартай бүтээгдэхүүнээр хангах юм. Технологийн дээд сургуулийн захирал Б.Барамсай энэ үйлдвэр зөвхөн үйлдвэрлэл явуулаад зогсохгүй оюутнуудыг сургаж дадлагажуулах ижил төрлийн үйлдвэрийн ажилчдын мэргэжлийг дээшлүүлэхэд ач холбогдолтой гэдгийг онцолж байлаа.

Үйлдвэр байгуулагдсанаасаа хойш 3000 гаруй ажилчны мэргэжлийг дээшлүүлснийг онцлов.

Тэрбээр тус сургуулийн дэргэдэх үйлдвэр байгуулагдсанаасаа хойш 3000 гаруй ажилчны мэргэжлийг дээшлүүлснийг онцлов. Уг үйлдвэр нь 2005 онд байгуулагдсан бөгөөд энэ удаа БШУЯ-ны Шинжлэх ухаан технологийн сангийн санхүүжилтээр шинэчилсэн байна. Тус сангаас 90 гаруй сая төгрөгийн санхүүжилт хийснээс одоогоор 60 гаруй сая төгрөгийн тоног төхөөрөмжийг байрлуулаад байгаа аж. Мөн тус үйлдвэр нь тогтсон худалдан авагчидтай бөгөөд бидний сайн мэдэх “Жүр үр”, “Өгөөж” зэрэг компаниудыг аарцаар хангадаг юм байна.