Хөдөлмөрийн сайд Я.Санжмятав сонгогдсон тойрогтоо ажиллаж байна. Тэрээр өнгөрөгч амралтын өдрүүдэд Завхан аймгийн Их уул, Тосонцэнгэл сумдад ажиллаж, ард иргэдтэй уулзаж, төр засгаас явуулж байгаа бодлого шийдвэр болон Хөдөлмөрийн яамны үйл ажиллагааны талаар танилцуулж, санал бодлыг нь сонссон байна.

Түүнийг аймагтаа ажиллах үеэр засаг дарга байхдаа эхлүүлсэн хүүхэд багачуудыг шатрын спортоор хичээлүүлэх бодлого өнөөдөр ид ажил хэрэг болж, хүүхэд багачууд олноор энэ спортоор хичээллэх болсон талаар нутгийн иргэд ам сайтай байгаагаа дуулгаж байсан юм.

Дэлхий нийтээр шатрыг оюуны их спорт хэмээдэг. Бид ч бас сүүлийн жилүүдэд хүүхдэд суурь боловсрол төлөвшил олгох, нөгөөтэйгүүр өв соёлоо хөгжүүлэн уламжлуулах гэсэн зорилгоор энэхүү спортод ихээр анхаарах болсон. Үүний нэг жишээ нь Завхан аймаг юм. Тус аймагт хэрэгжиж эхэлсэн 3-тулгуурт бодлогын хүрээнд энэ жил 9999 шатарч хүүхэд нэгэн зэрэг оюунаа уралдуулахаар бэлтгэгдэж байна. Үүний бэлтгэл болгож бүх сумдын сургуулиуд сорилго тэмцээн зохион байгуулсан байна.

 Долоон мянга гаруй хүн амтай Завхан аймгийн Их-Уул суманд сургуулийн насны 1000 орчим хүүхэд бий. Эдгээрээс 700 гаруй хүүхэд өнөөдрийн байдлаар шатрын спортоор хичээллэж, 9999 шатарчинд оролцох бэлтгэлээ базааж байна.

Ч.Амгаланбаатар шатрын багш

Ч.Амгаланбаатар шатрын багш: Бага ангийн багш нар үндсэндээ шатрыг өөрсдөө заах сонирхолтой болж ирж байна. Учир нь шатар сонирхосон хүүхэд математик сэтгэлгээтэй болж, цаашдын амьдралд нь суурь мэдлэг болдог гэдэг утгаараа манай багш нар их сонирхох болоод байна. Манай шатрын клуб хагас сайнд 10 цагаас эхлээд оройн 5 цаг хүртэл битүү хүүхэдтэй байдаг. Энд 300- 400 хүүхэд байнгын бэлтгэлтэй байдаг. Эцэг эхчүүд ч хүүхдийнхээ энэ спортоор хичээллэхэд анхаарал хандуулах болсон нь сайшаалтай байна.  

Их-Уул сум гудамж хашаа, айл хөршөөрөө шатраар наадаж сурах ийм эрмэлзэлтэй гэж байлаа. Учир нь шатрын спорт өөрөө хүүхдэд суурь боловсрол давхар тэсвэр тэвчээртэй байх цаашлаад амьдралын ухаанд сургадаг хүмүүжлийн зэвсэг гэж багш сурагчид хэлж байна.

Би шатраар хичээллэх дуртай.

“Би шатраар хичээллэх дуртай. Тэмцээнд ороод алтан медаль авсандаа баяртай байгаа” хэмээн 5 настай Мөнхбаяр хүү бидэнд ярьсан бол “Шатрын спорт бол оюун ухаан тэлдэг болохоор манай ангийнхан бүгдээрээ хичээллэж байгаа. Цаашид ч хичээллэнэ гэж бодож байгаа” хэмээн том ангийн эгч нар нь хэлж байна.

Харин Тосонцэнгэл сум аймагтаа хамгийн том, 10 мянган хүнтэй. Тус сум хүүхэд бүрийг шатарчин болгох зорилтыг хичээлээс гадуурх хөтөлбөртөө багтаасан байна. Үүний үр дүнд 400 гаруй амжилттай шатар тоглож байна гэж багш нар нь бахархан ярьж байлаа. Амжилттай тоглож байгаа 400 хүүхдээ ирэх намар болох 9999 шатарчин арга хэмжээнд оролцуулах зорилготой гэж байлаа.

Шатраар хичээллэх нь цагаа үр ашигтай өнгөрүүлэх, хүмүүжлийн асар ач холбогдолтой хэмээн эцэг эх хүүхдүүд өөсрдөө хэлж байна.

8 настай Ууганжаргал

Харин 8 настай Ууганжаргал охин тус шатрын тэмцээнээс Алтан медаль хүртсэн сэтгэгдлээсээ хуваалцахдаа шатрын спортыг сонирхож тоглох дуртайгаа хэлж байсан юм. Шатрын спортоор хичээлэгсдийн нас улам залуужиж 5 настнаас сургууль төгсөх хүртэл хүүхдүүд байгааг дуулгаж байлаа. Мөн дунд, ахлах ангийнхан тус спортоор хичээллэх болсноор чөлөөт цагаа зөв боловсон өнгөрөөж, оюун ухаанаа тэлээд зогсохгүй, аливаа хорт муу зуршилд автахгүй байх боломжтой болж байгаад эцэг эхчүүд  ам сайтай байсан юм.

Тосонгийн хүүхдүүд шатрын амжилт арвин, аймгийн хэмжээнд өнгөрсөн онд 2 алт, 2 мөнгө, 2 хүрэл медаль мөн 5 хүүхэд шагналт байранд орсон байна. Амжилт үзүүлсэн эдгээр шатарчид 3-сард Улаанбаатар хотод зохион байгуулагдах улсын аварга шалгаруулах тэмцээнд оролцох бэлтгэлээ хангасан гэлээ. Аймгийн аваргаас эхлээд Ази тивийн аварга хүртэл энэ сумаас төрсөн нь бахархалтай байна.

Хөдөлмөрийн сайдын эхлүүлсэн ажлын үр дүнд өнөөдөр тус  аймагт 9000 орчим хүүхэд багачууд шатрын спортоор хичээллэх болсон таатай мэдээлэл байгаа юм. Түүний эхлүүлсэн ажил ийнхүү биелэлээ олж, нутгийнх нь хүүхдүүд оюуны спортод шимтэх болсонд Хөдөлмөрийн сайд ч ихэд талархалтай байгаагаа илэрхийлж байлаа. Тэрээр өнөөдөр Тэлмэн, Нөмрөг, Идэр суманд ажиллаж, нутгийн иргэдтэй уулзан, санал бодлыг нь сонсох юм.