УИХ-ын Эдийн засгийн байнгын хорооны дарга Д.Ганхуягийг энэ буландаа урилаа.

-Гишүүдийн хөрөнгө, орлогын мэдүүлгээс харахад Та хамгийн олон азарга адуутай нь байсан. Моринд хайртай, уяач гишүүдийн нэг юм болов уу гэж бодлоо.

-Манай дээд удамд олон тайж байсан гэдэг. Социализмын үеийг яривал малч удамтай юм. Бид аав, ээжээсээ арвуулаа. Бүгд л мал маллах ухаанаар хүмүүжсэн байх. Аав, ах хоёр маань Улсын аварга малчин хүн байсан. Тэр л суурь нь болсон юм болов уу. Дүү нарын маань зарим нь малчин. Нэлээд тооны адуу, бог, бодтой. Би тэднээс нь тодорхой хувийг эзэмшдэг. 5-6 азарга адуу бий байх. Хуучны хошуу, одоогийн сум, аймгийн хэмжээнд морь уядаг. Миний хүүгийн нэр дээр гайгүй буян хуралдаж байгаа.

-Таныг жүдогоор барилддаг байсан гэсэн.

-Бөхийн удам байсан гэдэг. Дунд сургуульд байхдаа идэрчүүдийн тэмцээнд барилдаж байсан. Сүүлд хотод ирээд Их, дээд сургуулиудын тэмцээний 57 кг-д барилддаг байсан. Үндэсний болон чөлөөт бөхөөр дээд сургуулиудын тэмцээнд хүрэл медалийн эзэн болж байсан. Японд очоод жүдогоор нэг хэсэг ноцолдсон.

-Хэр амжилт үзүүлж байсан бэ?

-Гурван дан, хар бүстэй. Гадаадын хүүхэд сайн барилдлаа гээд их урам өгдөг байсан.

-Гурван дан гэдэг хэр өндөр зэрэг вэ?

-Чамлахааргүй өндөр зэрэг шүү. Монгол хүний тэвчээр япончуудаас илүү байдаг. Жүдо бол Японы үндэсний спорт. Спортыг Японд онол талаас нь сургахыг зорьдог. Гурван данг нэлээд хичээж байж авсан шүү. Манайд бол чанга талдаа орно. Киотогийн Политехникийн дээд сургуулийн жүдогийн аваргын тэмцээнд III, IY байр эзэлж байж.

-Бичиг, цаасны ажилтай зууралдаад хэдэн жил өнгөрлөө. Бие сулбайж байх юм уу?

-Долоо хоногтоо 2-3 удаа булчингаа чангаруулах байдлаар дасгал хийдэг.

-Өсөхбаяр аварга “Бридж” группийн нэрийн өмнөөс барилддаг. Компани бол бизнесийн ашиг хөөж явдаг газар. Сүүлийн үед бөхчүүд мэдэх, мэдэхгүй аж ахуйн нэрийн өмнөөс барилддаг. Ингэх нь ашигтай юу?

-Олон улсад байдаг л жишиг. Бизнесмэнүүд үндэсний спортоо ингэж дэмжиж байгааг буруутгаад хэрэггүй байх. Компаниараа цоллуулна гэдэг бол нэг ёсны сурталчилгаа, байгууллагаа олонд таниулах гэсэн нэг арга. Өсөхөө аваргын тухайд “Бридж” групптэй гэрээтэй, тодорхой хэмжээний цалин авна. Амжилт гаргавал урамшуулна. Намайг ажиллаж байхад боломжийн урамшуулал өгдөг байсан.

Д.Ганхуяг: Би гурван дан, хар бүстэй