Хөдөлмөрийн сайд Я.Санжмятав "Хөдөлмөрийн хүний төлөө" тэмдгээр шагнуулжээ. Монголын үйлдвэрчний эвлэлийн холбооноос хамгийн үр бүтээлтэй ажиллаж, олон хүнийг ажлын байраар хангаж,  мэргэжилтэй ажилтан бэлтгэсэн хэмээн уг медалийг олгосон байна.

УИХ-ын чуулганы өчигдрийн хуралдаанд тэрээр тэмдгээ зүүж ирсэн юм. Ямар учиртай шагнал болохыг Я.Санжмятав сайдаас тодрууллаа. Тэрээр "Үйлдвэрчний эвлэлийн байгууллагын гурван талт хэлэлцээрийг  Ерөнхий сайдын зөвлөхөөр ажиллаж байхаасаа эхлүүлж байсан. Энэ хэлцэл олон жилийн үр дүнгээрээ нэлээд тогтвортой болсон. Ийнхүү нийгэмд тогтвортой байдал бий болгох, хөдөлмөр, хүний төлөө тодорхой арга хэмжээ зохион байгуулах чиглэлээр хамтран ажилласан.

Мөн Хөдөлмөрийн яам, Үйлдвэрчний эвлэлийн байгууллагуудтай хамтран ажилласны  үр дүнгээр энэ шагналыг өгсөн. Өнөөдөр яагаад зүүж ирсэн бэ гэвэл Үйлдвэрчний эвлэл хийгээд МСҮТ-ийн захирлуудын хамтын арга хэмжээ болж байгаа юм. Цаашдаа хэрхэн мэргэжилтэй ажилтан бэлдэх вэ, энэ чиглэлээр яаж ажиллах вэ гэдэг зөвлөлгөөн болж байгаа учир зүүж ирсэн" гэлээ.