Үндэсний портал GoGo.mn сайтаас “Танай сум 90 жилийнхээ ойгоор юу бүтээснийг түмэнд гайхуулья” аяныг өрнүүлсэн.

Энэ жил 120 гаруй сумд 90 жилийнхээ ойг тэмдэглэлээ. Ийнхүү ойгоо тэмдэглэхдээ сумынхаа хөгжилд үр ашигтай бүтээн байгуулалт хийсэн үү эсвэл хэдэн морьд уралдуулж, бөх барилдуулаад өнгөрсөн үү гэдгийг бид энэхүү “Танай сум 90 жилийнхээ ойгоор юу бүтээснийг түмэнд гайхуулья” аянаараа тодруулахыг зорьж байгаа билээ.

Энэхүү аяны хүрээнд бидэнд мэдээлэл ирсээр байна. Та бүхэн өөрсдийн сумандаа хийсэн бүтээн байгуулалтын ажлын талаар зургийн хамт news@mongolcontent.mn хаягаар мэдээллээ ирүүлээрэй.

ЗАВХАН АЙМГИЙН САНТМАРГАЗ СУМЫН 90 ЖИЛИЙН ОЙ:

Монголын оюутны холбооны ерөнхийлөгч Х.Батсайхан ах дүү нарынхаа хамтаар Завхан аймгийн Сантмаргаз сумын 90 жилийн ойд зориулж тус сумын дунд сургуульд монгол хэлний иж бүрэн танхим, Насан туршийн боловсрол төвийг тохижуулан хүлээлгэн өгчээ.

Энэ жил сургуульд орох 34 сурагчид иж бүрэн хичээлийн хэрэгсэл бэлэг болгон өгчээ.

Түүний хувьд сумандаа үлдэх бүтээн байгуулалт хэрэгтэй гэдгээр энэхүү ажлыг санаачилсан байна. Монгол хэлний танхимд иж бүрэн комьпютер, номын сан, сурагчийн ширээ сандал, паркетан шал, ангийн булан, сүүлийн үеийн монгол хэлний ном, сэтгүүл, монгол хэлний дүрмийн самбар гэх мэт нэг ангид хэрэгцээ, шаардлагатай бүхий л зүйлийг гэр бүлийнхээ хамтаар тохижуулжээ.

Мөн энэ үеэр Завхан аймагт хэрэгжиж байгаа Номын гүүр хөтөлбөрийн 2000 номыг сурагч багачуудад тараахын зэрэгцээ энэ жил сургуульд орох 34 сурагчид иж бүрэн хичээлийн хэрэгсэл бэлэг болгон өгчээ.

Завхан аймагт хүүхэд бүр шатар сурах хөтөлбөр хэрэгжиж байгаа энэ үед тус ангийн бүх ширээ нь шатрын хөлөгтэй болсон нь ихээхэн онцлог болжээ.

Тэрээр нутгийн зөвлөлдөө мөнгө хандивлалгүйгээр ах дүү хамаатан саднаараа ойдоо хандивлах гэж байсан мөнгөө нийлүүлэн ийнхүү буянтай, номын сайн үйлийг бүтээж өгсөн байна.

Сумдуудын нутгийн зөвлөлүүд 200-500 саяар нэг наадам зохион байгуулсан бол 20 сая хүрэхгүй мөнгөөр ийм сайхан бүтээн байгуулалтыг хийжээ.

САНТМАРГАЗ СУМЫН ТУХАЙ:

Сантмаргаз сум нь Их эзэн Чингис хааны удмын Б.Батмөнх даян хааны отгон хүү Намжилдоржийн Норов тайж 1750 оноос захирч Засагт хан аймгийн Цэцэн сартуулын хошуунд багтаж Барга, Алаг адуун, Хороо, Солоон, Урианхай, Цөхүр, Цоохор, Хөтчин, Шавь зэрэг тархай бутархай олон отог бүлгүүдээс бүрдсэн ард түмэн нь бүхэлдээ халхжсан Завхан аймгийн анхны сумдын нэг сартуул угсаатныхан юм.

1921 онд ардын хувьсгал ялж ард түмний эрх чөлөө, тусгаар тогтнол мандаж, засаг захиргааг шинэчлэн хаад ноёдын нэрээр нэрлэх болж, 1923.10.19-нд Завхан аймгийн Хантайшир уулын аймаг болгож 20 хошуу, 3 шавь, 92 сумтайгаар зохион байгуулж, Сантмаргаз сумыг Бадрах, Холбоо, Тэгш, Ширээ гэсэн дөрвөн жижиг сумыг нэгтгэн 1924 онд нутгийн баруун зах болох Монголын элсний ар хаяа “Талингар”-ын их өтөгт хөдөлмөрчдийн Их хурал хийж Сант, Маргаз гэсэн нутгийн хоёр уулын нэрийг холбож Сантмаргаз гэдэг нэр өгч сумаа байгуулжээ.

Анх сум байгуулагдахад 878 өрх, 3614 хүн ам, 99 мянган толгой малтай, 4 багтай, 1200 км2нутаг дэсгэртэй, нэг баг 150-аас доошгүй өрхтэй, 5-аас доошгүй арван буюу хорины зохион байгуулалттай байжээ.

Одоо сум 4 багтай, 425 өрх, 1623 хүн амтай, 119,3 мянган толгой малтай, 242.1 мянган хавтгай дөрвөлжин км нутагтай. Их нууруудын хотгорын говийн бүсэд оршдог.

Эх сурвалж: http://www.zavkhan.gov.mn

Олон сум баяр наадам хийж дууслаа. Сум орон нутагт хүнд хэрэгцээ шаардлагатай юу хийсэн бол. Та өөрийн сумандаа баригдсан бүтээн байгуулалтын талаарх мэдээ материалыг зургийн хамт news@mongolcontent.mn хаягаар бидэнд илгээгээрэй.