БНСУ-ын ХААЭА-н агентлагтай хамтран Хөдөлмөрийн яамны Хөдөлмөрийн харилцааны бодлого зохицуулалтын газраас зохион байгуулсан “Барилгын салбарт ХАБЭА-н шаардлагыг хангах арга зам, туршлага” сэдэвт сургалт боллоо. Хэлэлцүүлэгт 6 дүүргийн Хөдөлмөрийн хэлтсийн ХАБЭА-н асуудал хариуцсан мэргэжилтэн, барилгын салбарт үйл ажиллагаа явуулж 50 гаруй компани, аж ахуйн нэгж, байгууллагын ХАБЭА-н ажилтан нар хамрагдлаа.

Сүүлийн үед барилгын салбарт үйлдвэрлэлийн ноцтой осол гарч байгаа нь энэ салбарт ХАБЭА-н хууль тогтоомжийг мөрдөх, үйлдвэрлэлийн ослоос урьдчилан сэргийлэхэд онцгой анхаарах шаардлага илүү ихээр тавигдаж байна.

БНСУ-ын ХААЭА-н агентлагтай хамтран сургалт хэлэлцүүлэг хийж байгаа нь барилгын салбарт ажиллагсдын хөдөлмөрийн аюулгүй байдал, эрүүл ахуйн орчин нөхцлийг зөв бүрдүүлэх, эрүүл аюулгүй ажлын байрыг бий болгох, үйлдвэрлэлийн ослоос урьдчилан сэргийлэх, ажлын арга туршлагаас нь суралцахад чиглэгдлээ.

БНСУ барилгын салбарт ХАБЭА-н шаардлагыг хангаж ажиллах талаар олон жилийн арга туршлагыг хуримтлуулсан юм байна. 1970-1980-аад оны үед энэ улсад бүтээн байгуулалтын ажил ид өрнөж, үйлдвэрлэлийн осол ихээр гарч байсан байна.

Манай улсын барилгын салбарт үйл ажиллагаа эрхэлж буй ихэнхи аж ахуйн нэгж, байгууллага, компаниуд ХАБЭА-н хууль тогтоомж, стандарт, дүрэм, журмыг үйл ажиллагаандаа мөрдөж, хэрэгжүүлдэггүй, ХАБЭА-н ажилтан, алба, хэлтсийг зохих орон тоогоор ажиллуулдаггүй, орон тооны тогтвортой ажилчид байхгүй, олон чиглэлээр түр зуурын туслан гүйцэтгэгч авч ажиллуулдаг,

ХАБЭА-н арга хэмжээнд шаардлагатай хөрөнгө зардал гаргадаггүй, ХАБЭА-н менежмент нэвтрүүлээгүй, тоног төхөөрөмжийн бүрэн бүтэн байдлыг хангаж ажилладаггүй зэрэг нь энэ салбарт үйлдвэрлэлийн осол гарах, улмаар ажилтны амь нас, эрүүл мэнд хохирох үндсэн шалтгаан болж байна гэж холбогдох байгууллагууд дүгнэсэн байна.

Энэхүү сургалтын үеэр ХАБЭА-н тухай хуульд нэмэлт өөрчлөлт оруулах болон ХАБЭА-н стандартыг шинэчлэн боловсруулах ажлын хэсгийн зарим төлөөлөл БНСУ-ын Хөдөлмөрийн аюулгүй ажиллагаа, эрүүл ахуйн агентлагийн мэргэжилтэн, профессор, эрдэмтэдтэй ярилцлага зохион байгуулж, санал бодол туршлагаа солилцох уулзалт хийлээ.

ХАБЭА-н тухай хуульд нэмэлт өөрчлөлт оруулах, зарим стандартууд тухайлбал, ажлын байрны дуу, гэрэл доргио чиэргээний стандартуудыг шинэчлэх чиглэлээр 2015 онд хамтран ажиллах боллоо.

Барилгын салбарт ажиллаж буй ХАБЭА-н ажилтнуудын мэдлэг чадварыг нэмэгдүүлэх, үйлдвэрлэлийн ослоос урьдчилан сэргийлэх, барилгын салбарт эрүүл аюулгүй ажлын байрыг бий болгоход энэ сургалт ихээхэн ач холбогдолтой боллоо гэж оролцогчид дүгнэж байв.

Барилгын салбарын 50 гаруй компани ХАБЭА-н ажилтан сургалтанд хамрагдлаа