Хөлбөмбөгийн ДАШТ зургаа дахь өдрөө үргэлжилж байна. Хөлбөмбөгийн хорхойтнууд дөрвөн жил хүсэн хүлээсэн тоглолтуудаа үзэхийн тулд цагийн зөрүүг үл ажирна. УИХ-ын гишүүд ч өөрийн дэмждэг баг, сонирхолтой тоглолтын тухай яриа өрнүүлж, дэлхийн цомыг хаанахын шигшээ баг авах талаар таамгаа уралдуулж байна. УИХ-ын хоёр гишүүнээс гурван асуултад хариулт авсан юм.

- Өнөөдөр тоглох багуудаас та аль нь хожно гэж таамаглаж байна вэ?

-Франц, Нигерийн багууд хожно. Аргентин сайн ч гэлээ Солонгосын багийг хожуулмаар байна. Ази тивээ төлөөлж орж байгаа Япон, БНСУ, БНАСАУ-ын багуудыг сэтгэл зүрхээрээ дэмжинэ. Тиймээс солонгосууд хожоосой.

-Та аль багийг дэмжиж байна. Энэ баг тань "Алтан цом"-ын эзэн болж чадах уу?

-Английн шигшээ цомын эзэн болох байх. Гараа тааруу эхэлсэн ч хөлбөмбөгийн өлгий орны хувьд найдвар бий. Герман, Итали, Бразил хүчтэй өрсөлдөгч байх болов уу. Английн Руни, Японы Хонда нар хөлбөмбөг сонирхогчдод ур чадвараа гайхуулна гэдэгт итгэлтэй байна.

-ДАШТ-ий тоглолтыг хаана үзэж байна. Бооцоо тавьж байна уу?

-Би Японд сургууль төгсөгчдийн холбооны тэргүүнээр ажилладаг. Зарим тоглолтыг Монголд ажиллаж байгаа японуудтай хамт үзэж байгаа.