Нам, эвслийн бүлгүүд Тавантолгойн асуудлаар саналаа нэгтгээгүй байгаа ч АН-ын гүйцэтгэх зөвлөл Тавантолгойн асуудлаар намынхаа байр суурийг нэгтгэн танилцуулсан байгаа.

Тэд Тавантолгойн төсөлд төрийн  өмчит "Эрдэнэс Тавантолгой" компани 51 хувь, бусад нэгдэл, консерциум 49 хувийг эзэмших ёстой гэсэн юм. Тэгвэл өчигдөр "Шударга ёс" эвсэлд багтдаг МАХН- ын төлөөллүүд болох УИХ- ын гишүүн З.Баянсэлэнгэ, Д.Тэрбишдагва, Л.Цог болон О.Баасанхүү нар Тавантолгойн төсөлд өөрийн намын байр суурийг төлөөллөө. Ингээд    тэд АН-ын гүйцэтгэх зөвлөлөөс гаргасан шийдвэртэй төстэй мэдэгдэл хийж, "Эрдэнэс Тавантолгой" компани Тавантолгойн 51 хувийг, бусад нэгдэл, консерциум 49  хувийг эзэмших ёстой гэлээ.

Гэхдээ энэ орд бүхэлдээ ард түмний мэдэлд байх ёстой гэж байгаа юм байна. Түүнчлэн "Шударга ёс" эвслийн бүлгийн шийдвэр гараагүй байгаа учир нь МҮАН-ын байр суурь баттай болоогүй, МҮАН-ы дарга М.Энхсайханы хувьд Монгол Улсын сайд гэдгээрээ өөрийн үзэл бодлоо илэрхийлж байгаа гэсэн юм. Тиймээс тэдний мэдэгдлийг "Шударга ёс" эвслийн бүлгийн байр суурь гэж үзэж болохгүй нь.

МАХН-аас     гаргасан мэдэгдэлд,

1. Тавантолгойн орд газар бүх ард түмний мэдэлд байж, хувьцааг Монгол Улсын бүх иргэн эзэмших ёстой гэж МАХН үзэж байна. Тиймээс төрийн мэдэлд байгаа бүх хувьцааг иргэдийн нэр дээр шилжүүлж баталгаажуулах.
2. Тавантолгойн орд газрыг ашиглахдаа Монгол Улсын . хууль тогтоомжид нийцүүлэн харилцан ашигтай, ард түмэндээ өгөөжтэй байхыг баримтлах ёстой.

УИХ-д өргөн бариад байгаа гэрээ нь МАХН- ын зарчмын байр суурийг хангаагүй байна. Тиймээс МАХН дэмжих боломжгүй. Таван толгойн орд газрыг ашиглах тогтоолын төслийг хууль тогтоомжид нийцүүлэн, нийтлэг эрх ашгийг хамгаалан батлахыг уриалж байна гэв.

МАХН-ын гишүүд энэ талаар байр сууриа ийн илэрхийлсэн юм.

Д.Тэрбишдагва: Ажлын хэсэг их оройтож байгуулагдаж байна. УИХ- ын дарга, түүний гурван дэд даргын гарсан санал болгонд дүгнэлт хийж, ажлын хэсэгт орсон хүмүүсээр дамжуулж, өөрсдийнхөө боловсруулсан байр суурийг илэрхийлэхийн тулд ажиллах болно.

О.Баасанхүү:  Зарим нөхдүүд 51 хувийг "Эрдэнэс Тавантолгой" компани нэгдэл, консерциум 49 хувийг эзэмшинэ гээд байгаа. Энэ бол оператор буюу ажил гүйцэтгэх гэрээний хувьд яриад байгаа зүйл. Харин МАХН Цанхийн ордоос гаргах ашгийн 51 хувийг бид авах ёстой гэж яриад байгаа юм шүү. Иргэд 1072 хувьцаа эзэмшиж байгаа. Ингээд ногдол ашиг тооцох болохоор Шенхуад энэ нь хамаагүй болчихоод байгаа юм. Тиймээс бидний хувьцаа байгаа "Эрдэнэс Тавантолгой" компани ашгийн 51 хувийг хүртэж байж бид хувьцааны ашиг хүртэх юм. Аман дээрээсээ 30 ам.доллар, угаагаад үйлдвэрлэхээр 85 ам.доллар. Ингээд нэг хүн хамгийн багадаа жилд хувьцааны ашиг гэж 300 гаруй ам.доллар авах боломжтой. Ингээд 30 жил, 60 жил авах тухай яриад байгаа юм. Ийм боломжтой..