Эргэн дурсахад дурсамж бүхэн сайхан байдаг. Тэртээ 1965 онд октябраар овоглон анх байгуулагдаж байсан Баянгол дүүрэг өдгөө 50 жилийн ойтойгоо учран золгож байна.

Дүүргийн 50 жилийн ойд зориулан бүтээсэн “Октябраар овоглосон он жилүүд...” баримтат кино өнөөдөр Өргөө кино театрт нээлтээ хийлээ.

Нээлтийн үйл ажиллагаанд дүүргээс сонгогдсон УИХ-ын гишүүд, дүүргийн үе үеийн удирдлагагууд, киноны уран бүтээлчид, дүүргийн Тамгын газрын ажилчин албан хаагчид оролцож хагас зуун жилийн түүхээ хамтдаа эргэн дурсацгаасан юм.

Энэхүү киног “Намуун Зэт” студи бүтээсэн бөгөөд тус студийн захирал, МУСГЗ сэтгүүлч, гайруулагч Г.Золжаргалд дүүргийн хүндэт иргэн цол тэмдэг гардууллаа. Тэрээр “Би бол Баянгол дүүргийн иргэн.Энд өсөж, эндээс ажил хөдөлмөрийн гараагаа эхэлж, уран бүтээлээ туурвиж явна. Өнөөдөр байгаа учраас өчигдөр, маргааш гэж байдаг. Энэ удаагийн баримтат кино маань өнгөрсөн, одоо, ирээдүйг харуулах гурван цуврал киноны эхлэл юм.

Дараагийн баримтат кинонууд маань дүүргийн хөгжил цэцэгжилтийг өөрсдийн гараар бүтээж яваа, ирээдүйн их бүтээн байгуулалтыг хамтдаа бүтээх залуусд чиглэсэн, тэднийг уриалсан бүтээл болох болно. Энэ дашрамд нийт Баянголчууддаа түүхт 50 жилийн ойн баярын мэнд дэвшүүлье” хэмээн нээлтийн арга хэмжээг эхлүүлсэн юм.

“Октябраар овоглосон он жилүүд...” баримтат кино нээлтээ хийлээ