Наймдугаар сарын улс төр халуухан өрнөж байна. Зуны амралтын хугацаанд зарласан УИХ- ын ээлжит бус чуулганы хэлэлцэх асуудлын хамгийн их анхаарал татаж буй юмны нэг нь Засгийн газрын зарим гишүүнийг огцруулах, томилох тухай асуудал юм.

Гэвч энэ асуудлыг өргөн бариагүй байхад хэлэлцэх асуудлын жагсаалтад оруулсан нь хууль бус үйлдэл гэж үзэх гишүүд олон байна. Тиймээс Төрийн албан хаагчдын холбооны Удирдах зөвлөлийн гишүүн З.Энхболд, Я.Эрдэнэсайхан нар УИХ-ын дарга З.Энхболдыг хууль зөрчсөн хэмээн Үндсэн хуулийн Цэцэд хандаж байгаагаа мэдэгдэв. Харин энэ талаар УИХ-ын зарим гишүүдээс тодрууллаа.

Ө.Энхтүвшин: Хууль зөрчсөн үйлдэл

-Засгийн газрын зарим гишүүнийг огцруулах, томилох тухай асуудлыг өргөн бариагүй байхад УИХ-ын чуулганаар хэлэлцэх асуудлын жагсаалтад оруулж байгаа нь хууль зөрчсөн үйлдэл. Энэ асуудлыг Ерөнхий сайд өөрөө өргөн барих ёстой. Хэдийгээр өөр гишүүн өргөн барьж болох ч зарчмын дагуу Ерөнхий сайд өргөн барих ёстой. Өнөөдрийг хүртэл өргөн бариагүй байна.

Д.Батцогт: Сайд нарын асуудлыг Ерөнхий сайд өргөн барина

Засгийн газрын зарим гишүүнийг чөлөөлөх  асуудлыг процедурын дагуу явагдана. Ерөнхийлөгчтэй зөвшилцөх шатандаа явагдаж байна. Ерөнхий сайд өнгөрсөн баасан гарагт Ерөнхийлөгчтэй зөвшилцөхөөр өргөн барьсан гэсэн. Тэгэхээр удахгүй өргөн барих байх. Энэ асуудлыг намын бүлгийн дарга бус Ерөнхий сайд өөрөө өргөн барина.

С.Ганбаатар: Засаг төр тогтвортой байх ёстой

-Засаг төр тогтвортой байх ёстой. АН-ын Засгийн газар байна уу, МАН-ын Засгийн газар байна уу аль эсвэл хамтарсан нь байна уу гэдэг гол асуудал биш. Харин засаглал тогтвортой байх ёстой гэдэг дээр бид хатуу байр суурьтай байна.