1990 оноос хойш Япон-Монголын харилцаа улам гүнзгийрч бүхий л салбарт эрчимтэй хөгжих болсноор япон хэлийг сонирхон суралцагчдын тоо нэмэгдсээр байгаа. Суралцагчид хэл сурахын зэрэгцээ Японы эдийн засаг, улс төрийг сонирхон энэ талаар суурь мэдлэгийг эзэмшихийг зорьж байна. Энэ удаа их, дээд сургуулийн оюутан залуучууд бусад мэргэжлийн хүмүүст зориулан Монгол Улсын Их Сургуулийн Монгол хэл соёлын сургуулийн багш Л.Энхсайхан нь Япон сангийн тэтгэлгээр Япон-Монгол, Монгол-Япон улс төр, эдийн засаг тодруулбал хөрөнгийн зах зээлийн нэр томьёоны толь бичгийг эмхэтгэн гаргажээ. Энэ толь бичиг нь Японы улс төр, эдийн засгийн толь бичгээс өргөн хэрэглэгдэх нэр томьёо болох 11,200 гаруй үг, түүний дотор улс төрийн үг хэллэг 2000 гаруйг оруулсан байна. Уг толь бичгийг Улсын Их Хурлын гишүүн, Улсын Их Хурал дахь Монгол-Японы парламентын бүлгийн дарга Д.Ганхуяг, мөн МУИС-ын Монгол хэл соёлын сургуулийн багш профессор Мүнэюки Мухай, Монгол дахь хөрөнгө оруулалтыг дэмжих, хувийн хэвшлийг хөгжүүлэх Зөвлөлдөх зөвлөлийн санхүү, эдийн засгийн шинжээч Э.Буяндэлгэр нар хянан тохиолдуулсан байна.