УИХ-ын гишүүн Д.Ганхуягтай ярилцлаа.

Засгийн газар зургаан сайдаа намрын чуулган хүртэл өргөн барихгүй гэж мэдэгдсэн. Үүнийг та юу гэж үзэж байгаа вэ?

- АН-ын бүлэг сайд нарыг ойрын хугацаанд өргөн мэдүүлэх ёстой гэсэн байр суурьтай байгаа. УИХ-ын дарга өчигдөр Ерөнхий сайдад “Хууль хэрэгжүүлэн ажиллах тухай”  албан тоот хүргүүлсэн. Тэгэхээр ирэх сарын 6-наас өмнө сайд нараа өргөн мэдүүлэх байх гэж бодож байна. УИХ-ын тухай хууль, Засгийн газрын тухай хуульд тодорхой заасан. Хуулиа баримтлах ёстой.

- Сайд нарыг ээлжит бус чуулганаар чөлөөлсөн болохоор  30 хоногийн дотор томилно гэсэн хуулийн заалт үйлчлэхгүй гэж тайлбарлаад байгаа?

- Хуульд ээлжит болон ээлжит бус гэсэн үг байхгүй. Засгийн газрын тухай хуулийн 21-р зүйлийн 2-т “Ерөнхий сайд, Засгийн газрын гишүүн хуульд заасан үндэслэлээр албан тушаалаас огцорсон, чөлөөлөгдсөн, нас нөгчсөн тохиолдолд түүний бүрэн эрх хугацаанаас өмнө дуусгавар болно. Ийнхүү ерөнхий сайд, Засгийн газрын гишүүний орсон гарсан тохиолдолд УИХ 30 хоногийн дотор түүнийг нөхөн томлино” гээд цагаан дээр хараар бичсэн байгаа. Ээлжит чуулган хүлээнэ гэвэл хууль зөрчсөн хэрэг болно.

Бүрэлдэхүүнээ хурдан гүйцээх хэрэгтэй. Төрийн ажил саадгүй, цалгардалгүй үргэлжлэх ёстой. Үүний тулд УИХ завсарласан ч ээлжит бус чуулган зарлана гэдгээ УИХ-ын дарга мэдэгдсэн. Аравдугаар сард намрын чуулган эхлэнгүүт ирэх оны төсөв хэлэлцэнэ. Түүнээс өмнө салбарын сайд нарыг томилох нь зүйтэй.