Хаврын чуулганаар хэлэлцэх асуудалд УИХ-ын сонгуулийн тогтолцоог өөрчлөх тухай хуулийн төсөл  орсон. Гэхдээ төсөл нь бэлэн болоогүй байгаа юм. Төрийн байгуулалтын байнгын хорооны дарга Ө.Энхтүвшин  хэлэхдээ "Зайлшгүй шийдэх ёстой томоос том асуудал учраас төсөл нь  бэлэн болохоор дараалал харгалзахгүй хэлэлцэх ёстой" гэв. Түүнээс энэ тухай нь тодрууллаа.

-Сонгуулийн тогтолцоог өөрчлөх ёстой гэсэн зарчмын шийдэлд намууд хүрсэн гэж ойлгож байгаа. Гэхдээ эсрэг байр суурьтай хүмүүс ч байгаа юм байна...

-Ажлын хэсгийн байр суурь тодорхой. Пропорциональ хувилбарыг сонгох эхний тохиролцоонд хүрсэн. Энэ талаар бүлгүүдээр эргээд ярилцаж байна. Саналын зөрүү бий. Одоогийн жижиг тойргоо авч үлдэх гэсэн саналтай гишүүн нэлээд бий. Хүн бүрээс бичгээр санал авч байгаа. Пропорциональ тогтолцоог дэмжигчид нь олонх болох магадлал байгаа юм билээ.

-Төрийн байгуулалтын байнгын хорооны түвшинд гол зүйл яригдана. Хэзээ хэлэлцэх боломжтой вэ?

-Ажлын хэсэг саналаа танилцуулах ёстой. Бидний өмнө байгаа хамгийн том асуудал учраас дараалал харгалзахгүй хэлэлцэнэ.

-"Том асуудал" гэдгийг олон түмэнд сайн ойлгуулах хэрэгтэй санагддаг. Жижиг сонирхол хүчтэй хэвээр байгаа юм байна шүү дээ.

-Мөнгөний сонгууль, худал амлалтаас татгалзах нь зөв гэж байгаа бол пропорциональ хувилбарыг л сонгох ёстой болж байна. Монголын уул уурхайн салбар гадаадынхны сонирхлыг их татаж байна. Сонгуулийн өнөөгийн тогтолцоо хэвээр байвал тойрог худалдаж авах сонирхол нэмэгдэнэ. Түүндээ эргээд барьцаалагдана Монгол Улс тусгаар тогтнолоо алдах аюулд ч хүрч мэднэ. Тийм учраас сонгуулийн одоогийн тогтолцоог өөрчлөхгүй ёстой гэсэн байр суурьтай байна, би. Хэлэлцүүлэг ямар байдлаар өрнөхииг мэдэхгүй. Жижиг сонирхолдоо хөтлөгдсөн хүн нэлээд бий. Тэд янз бүрийн тайлбар хэлдэг ч тэр бүхнийх нь цаана тодорхой явцуу сонирхол байхыг үгүйсгэхгүй.

-Улс төрийн таатай боломж өнөөдөр бүрдчихээд байна. Боломжоо ашиглах ёстой гэж олон түмэн хүсэж байгаа. Сонгуулийн хуульд өөрчлөлт оруулахад цаг хугацааны хязгаар гэж бас бий шүү дээ.

-Энэ нөхцөл байдлыг ашиглах ёстой. Бидний өмнө тулгамдаад буй олон асуудлын нэг нь сонгуулийн тогтолцоогоо өөрчлөх явдал юм. Улс төрийн тааламжтай энэ цаг хугацааг ашиглахгүй бол цаашдаа хүнд болно. Бүр боломжгүй болж ч мэднэ. Тийм учраас яарах хэрэгтэй. Бүлгүүд даруй зөвшилцөх ёстой. Манай намын дарга С.Баярын дэвшүүлсэн таван төгөлдөршлийн нэг нь сонгуулийн тогтолцооны асуудал учраас намын Бага хурлаар ч энэ тухай ярилцана. Хүчтэй эсэргүүцэл байгаа хэдий ч пропорциональ хувилбарыг дэмжих ерөнхий дур зураг харагдаж эхэлсэн.