Эдийн засгийн байнгын хорооны хурлаар "Газрын тосны бүтээгдэхүүний тухай" хуульд өөрчлөлт оруулах төсөл болон Газрын тосны бүтээгдэхүүний хангамжийг нэмэгдүүлэх талаар авах зарим арга хэмжээний тухай "УИХ-ын тогтоолын төслийг хэлэлцэх болоход гишүүн Ц.МөнхОргил "УИХ-ын даргын захирамжаар ажлын хэсэг байгуулагдсан. Ажлын хэсэг 14 цагт хуралдана. Маргааш чуулганы завсарлагаар байнгын хороо хурал-дуулах замаар үүнийг шийдвэрлэе. Иймд эл асуудлыг хойшлуулах хүсэлтэй байна" гэж хэлснээр хойшлогдов. Мөн "Ашигт малтмалын тухай" хуульд оруулах өөрчлөлтийг ярих болоход гишүүн Н.Батбаяр "Хоёр хуулийн төслийг нэгтгэх ажлын хэсэг байгуулагдсан. Ажлын хэсэг хуралдаагүй байна. Хойшлуулах хэрэгтэй" гэж хэлс-нээр хэлэлцэх асуудлын жагсаалтаас гарав. Ийнхүү байнгын хорооны хурлаар хэлэлцэх хоёр гол зүйл хойшлогдлоо. Харин "Монгол Улсын иргэнд газар өмчлүүлэх тухай" хуульд оруулөх өөрчлөлтийн төслийг хэлэлцлээ. Эл хуулийн өрхийн хэрэгцээнд 0.07 га газар хувьчилж байсныг иргэнд болгож өөрчлөх юм байна. Гэхдээ өрхийн хэрэгцээнд иргэнд хувьчлах 0.07 гаг нийслэл Улаанбаатар, Дархан, Эрдэнэтэд гэснийг нийслэлтэй аймгуудыг холбосон хар замын дагуух төв суурин газарт гэж хүрээг нь зааж өгөх хэрэгтэй хэмээн гишүүн Д.Тэрбишдагва санал гаргав. Мөн газар хувьчлах хугацааг 2013 он гэж хуульд заасныг өөрчлөх хэрэгтэй. Үүн дээр хугацаа байх шаардлагагүй хэмээн Н.Батбаяр гишүүн байр сууриа илэрхийлэв. Байнгын хорооны дарга Д.Ганхуяг "Гүйцэтгэх засаглалын нөхөд газрын хувьчлалыг хугацаагаар шахах нь зөв гэж үзээд байгаа юм. Ажлын хэсэг үүн дээр тайлбар өгөөрэй" гэж хэллээ. Байнгын хорооны даргын хэлсний дагуу ажлын хэсгийн гишүүн Геодези зураг зүй, газрын харилцааны газрын дарга н.Батсүх "Газар
хувьчлалыг хугацаагаар шахаж өгөхгүй бол газар эдийн засгийн эргэлтэд ордоггүй муу талтай гэж олон улсын туршлагатай экспертүүд зөвлөж байгаа тул хугацаатай оруулж ирсэн" хэмээн тайлбар өгөв. Хуулийн төсөл буюу газар хувьчлалыг 2013 он хүртэл гэсэн хугацаатай байхыг дэмжиж байгаа эсэх талаар санал хураахад гишүүдийн олонхи нь дэмжлээ. Харин Н.Батбаяр гишүүн цөөнхөөр үлдэв. Хугацаа байх эсэх дээр өөр байр суурьтай гишүүд байсан ч өрхийн хэрэгцээнд иргэнд газар хувьчлах хуулийн төслийг Эдийн засгийн байнгын хороо дэмжсэн.