Монгол Оросын хамтарсан залуу судлаачдын онол практикийн бага хурал өнөөдөр/2016.09.06/ Хөдөө аж ахуйн Их сургуулийн Эрдмийн зөвлөлийн танхимд болж өнгөрлөө.

Тус хурал өчигдөр /2016.09.05/ нээлтээ хийсэн бөгөөд энэ сарын 10 хүртэл үргэлжлэх юм байна. Хурлын онцлог нь шинжлэх ухааны тулгуур салбар болох техник технологи, байгалийн ухаан, геологи газарзүй, анагаах ухааны салбар, нийгмийн ухааны салбар, биологи хөдөө аж ахуй гэх мэтчилэн зургаан салбарт тулгуурлан хоёр орны залуу эрдэмтэд хоорондоо илтгэл хэлэлцүүлж байгаа юм.

Энэ оны /2016/ тавдугаар сард Монгол Улсын төлөөлж 100 гаруй залуу судлаачид ОХУ-ын Эрхүү хотод очиж эрдэм шинжилгээний хуралд оролцсон бол өнөөдөр болж буй хуралд ОХУ-г төлөөлөн 60 гаруй залуу эрдэмтэн судлаачид хүрэлцэн ирсэн байна.

Хурлын ач холбогдол нь хоёр улсын залуу эрдэмтэн судлаачдын харилцан хамтын ажиллагааг идэвхжүүлэх мөн цаашлаад олон улсад өөрийн орны залуу судлаачдын бүтээлийг танилцуулах зорилготой гэнэ.

Тус хуралд ихэвчлэн магистрант, докторантаас гадна эрдмийн зэрэг цолтой залуу судлаачид оролцож байгаа.

Энэхүү хуралд оролцсоноор тухайн судлаач оюутнуудын хувьд өөрийнхөө судалгааны ажлыг олон нийтэд танилцуулах, цаашлаад хамтран ажиллах дэмжлэг авах боломж нь нээгдэж байгаа юм. Ирэх жилээс энэхүү хурал нь уламжлал болгон зохиогдоно юм байна.