Монгол Улсын Засгийн газраас 2017 оны 11 дүгээр сарын 28-ны өдөр өргөн мэдүүлсэн ЭДИЙН ЗАСГИЙН ХАМТЫН АЖИЛЛАГААНЫ ОЛОН УЛСЫН БАНК үүсгэн байгуулах, түүний үйл ажиллагааны тухай хэлэлцээр болон Эдийн засгийн хамтын ажиллагааны олон улсын банкны ДҮРЭМД өөрчлөлт оруулах тухай 2014 оны ПРОТОКОЛЫГ соёрхон батлах тухай хуулийн төслийг УИХ-ын 2017 оны 12 сарын 07-ны өдрийн нэгдсэн хуралдаанаар хэлэлцэж баталсан юм.

Эдийн засгийн хамтын ажиллагааны олон улсын банкийг хуучнаар Эдийн засгийн харилцан туслалцах зөвлөлийн гишүүн орнуудын Засгийн газар хоорондын 1963 оны хэлэлцээрийн дагуу үүсгэн байгуулсан.

Харин Манай улс тус хэлэлцээрийг БНМАУ-ын Ардын Их Хурлын Тэргүүлэгчдийн “Хэлэлцээр батлах тухай” 1963 оны 12 сарын 11-ний өдрийн 223 дугаар зарлигаар баталсан байдаг аж.

Уг хэлэлцээр болон банкны дүрэмд 1970 оны 12 сарын 18, 1977 оны 11 сарын 23, 1990 оны 12 сарын 18, 2014 оны 11 сарын 25-ны өдрийн нийт 4 удаагийн протоколоор тус тус нэмэлт, өөрчлөлт оруулсан байдаг байна.

Тиймээс Монгол улс ЭЗХАОУБ-ны гишүүний хувьд 014 оны протоколыг хүлээн зөвшөөрч, гишүүний эрхээ хадгалах шаардлагтай байгаа бөгөөд энэ зорилгоор хуулийн төслийг Засгийн газар боловсруулан, УИХ-аар батлуулсан юм.

ЭЗХАОУБ-ын 2014 оны протоколоор дараах өөрчлөлтүүд орсон байна.

Бүгд Найрамдах Унгар Улс болон Бүгд Найрамдах Куба Улс Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээрт оролцохоос татгалзаж, Эдийн засгийн хамтын ажиллагааны олон улсын банкны гишүүнчлэлээс гарсан;
Эдийн засгийн хамтын ажиллагааны олон улсын банкны гишүүнчлэлд өөрчлөлт орсонтой холбоотойгоор банкны дүрмийн санд оруулсан хувийг дахин хуваарилж гишүүн орон тус бүрийн банкны дүрмийн сан дахь хувь хэмжээ нэмэгдсэн;
Банкны дүрмийн сан бүрдүүлсэн валютын нэр “ЭКЮ” байсныг “ЕВРО” болгон өөрчилсөн;
Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээрийн эх хувийг хуучнаар Эдийн засгийн харилцан туслалцах зөвлөлийн Нарийн бичгийн дарга нарын газарт хадгалж байсныг ОХУ-ын Гадаад хэргийн яаманд шилжүүлсэн зэрэг өөрчлөлтүүд оржээ.

Хуулийн төслийг хэлэлцэх үед зарим УИХ-ын гишүүд "Хуучин СОЦИАЛИСТ орнуудын хамтын ажиллагааны САНХҮҮГИЙН хэлбэрийг ҮРГЭЛЖЛҮҮЛЬЕ гэсэн санаа яваад байгаа юм. Бид санаачлагч нь болоод дагаж орох нь зөв үү, буруу юу? Үүн дээр САНГИЙН ЯАМ, ГАДААД ХАРИЛЦААНЫ ЯАМ анхаарч ажиллаарай" гэсэн байр суурь илэрхийлж байлаа.

Монгол Улс ЭЗХАОУБ-ны ГИШҮҮНИЙ ЭРХЭЭ хадгалав