УИХ-ын чуулганы /2018.05.11/ хуралдаанаар  “Монгол Улсын эдийн засаг, нийгмийг 2019 онд хөгжүүлэх үндсэн чиглэл батлах тухай” тогтоолын төслийг хэлэлцлээ.

Нэгдсэн төсвийн нийт орлого 2018 онтой харьцуулахад 2019 онд 1.9 их наяд орчим тэрбум төгрөгөөр нэмэгдэх, сүүлийн жилүүдэд 4 оронгоор хэмжигдэж байсан зээлийн үйлчилгээний төлбөр 300 орчим тэрбум төгрөгөөр буурч 860 гаран тэрбум төгрөг болох, Засгийн газрын өнөөгийн үнэ цэнээр илэрхийлсэн нийт өрийн ДНБ-д эзлэх хувь 10 орчим хувиар буурч, ДНБ-ий 55 гаруй хувьд хүрэх, Засгийн газрын дотоод нийт өр дунд хугацаанд тогтмол буурах,  хөрөнгө оруулалтын зардал болон цэвэр зээл 760 гаруй тэрбум төгрөгөөр нэмэгдэх, төсвийн алдагдал 314 тэрбум төгрөгөөр буурах, төсвийн алдагдлыг нөхөх зориулалтаар дотоодын бонд гаргахгүй байх зэрэг эерэг нөхцөл байдлууд бүрдэнэ гэж төсөөллөө гэдгийг онцлов. Нэгдсэн төсвийн 2019 оны хүрээний мэдэгдэл, 2020-2021 оны төсвийн төсөөлөлд нэгдсэн төсвийн тэнцвэржүүлсэн тэнцлийн ДНБ-д эзлэх хувийг 2019 онд -6.1, 2020 онд -4.3, 2021 онд -2.5 байхаар тус тус тооцжээ.

УИХ-ын гишүүн М.Билэгт: 

Эрүүл мэндийн даатгалыг төр, хувийн хэвшлийн эрүүл мэндийн байгууллагат адилхан олгохоор заасан байна. Энэ чухал заалт өнгөрсөн 27 жил эрүүл мэндийн даатгал үр дүнгээ өгөөгүй. Яг ингэж явбал үр дүнгээ өгнө. Эрүүл мэндийн салбар эрэлтээ өөрөө жолооддог. Гол цөм нь эмч нар. Иймд дунд шатны захиргааны орон тоог цомтгоод эмч, сувилагч нарын тоо, цалин дээр анхаарах хэрэгтэй.Эмч нарт өрсөлдөх боломж олгож байж, үр дүнд хүрнэ. Эрүүл мэндийн салбарын тогтолцоог өөрчлөх хэрэгтэй.

УИХ-ын гишүүн, Сангийн сайд Ч.Хүрэлбаатар:

Эрүүл мэндийн даатгалаар санхүүждэг тогтолцоог хувь, төрийн хэвшилд адилхан өгөхөөр болж байгаа.

Төр бүх ажлаа хийж чадахгүй.Орчин үеийн цахим технологийг эрүүл мэндийн салбарыг оруулахаар төлөвлөж ажиллаж байна. Ингэснээр ил тод харагдана.Ирээдүйд эрүүл мэндийн салбарыг хөгжих боломж олгоно.Бас улсын эмнэлэгт өөрсдөө санхүүжих боломж олгож байгаа. Ингэснээр эдийн засгийн асуудал шийдэгдэнэ гэж харж байна.