УИХ-ын гишүүд энэ оны улсын нэгдсэн төсөвт 76 тэрбум төгрөг тусгаж тойрогтоо нэг тэрбум төгрөгийг захиран зарцуулах эрхтэй болсон билээ. Гишүүд тэрбум төгрөгөөрөө юу хийснийг танилцуулж байна.

С.Эрдэнэ: Санаачилсан ажлын 80 хувь дууссан

Миний санаачилсан ажлын 80 гаруй хувь нь амьдрал дээр биелэлээ олоод байна. Нэг тэрбум төгрөгийн хүрээнд Эрүүл мэнд гэсэн хөтөлбөрийг хэрэгжүүлсэн. Эрүүл мэндийн долдугаар төвд хоёр кабинетэд засвар, тохижилт, эхо, дурангийн аппаратыг суурилуулж, арван өрхийн эмнэлэгт түргэн тусламжийн тэрэг олгосон. Мөн дүүргийнхээ 200 гаруй өрхийн амьжиргааг нь дээшлүүлэх зорилгоор орон гэр олгосон байгаа. Нийтийн аж ахуйг сайжруулах ажлын хүрээнд дүүрэгт халуун усны асуудлыг шийдсэн. Мөн он удаан жил засвар хийгдээгүй орон сууцны дээврийн засварыг хийж, 3,4,10 дугаар хороолол болон зургадугаар бичил хорооллын орон сууцны цахилгаан шатыг засварлах ажил үргэлжилж байна. Авто замын ажил одоогоор хийгдэж байгаа. Тухайлбал, есдүгээр хороонд 1,2 км, аравдугаар хороонд 0.9 км, 11 хороонд 1.4 км, нийт 3.,5 км хатуу хучилттай зам тавигдаж байна. Эдгээр зам засварын ажил гэрүүлтүүлгийн ажилтайгаа хамт хийгдэж байгаа. Мөн гудамжны тохижилтын ажил хийгдсэн. Ард Аюуш, Магсаржав, Жасрайн гудамжийг иж бүрэн тохижуулсан. Энэ ажлуудаас гадна жижиг дунд үйлдвэрийг дэмжих, оюутан залуусыг тэтгэлэг хөтөлбөрт хамруулах, ахмад өндөр настны халамжийн хөтөлбөр гээд олон ажил өрнөж байна.

С.Эрдэнэ: Санаачилсан ажлын 80 хувь дууссан