Засгийн газарт тавьсан асуулгынхаа хариуг УИХ арван сарын дараа авлаа. Баасан гарагийн үдээс хойшхи чуулганы хуралдаанаар Оюутолгойн ордын ТЭЗҮ-ийн талаар С.Эрдэнэ гишүүний нэгдүгээр сард тавьсан асуулгын хариуг сонссон юм. Асуулгад дурдсан ТЭЗҮ-ийн талаарх асуудал нь нэгэнт гэрээ хүчин төгөлдөр болоод зургаан сарыг ардаа үдчихээд ач холбогдлын хувьд өнгөрсөн, хий дэмий зүйл гэдэг нь хэнд ч ойлгомжтой байв. Тийм ч учраас хий дэмий цаг барж хугацаа алдсан зүйл ярьж байгаад гишүүд шүүмжлэлтэй хандаж байсан юм. Гэхдээ Оюутолгой гэрээний хэрэгжилттэй холбоотой асуудлаар бухимдах зүйл гишүүдэд цөөнгүй байсан. Ялангуяа Оюутолгойд шууд ажиллах монгол ажилчдын тоотой холбогдуулан нэлээд олон асуулт тавив. Харин Д.Зоригт сайд асуулгын хариуг эс тооцвол тэдний асуултад тодорхой хариулт бараг өгсөнгүй. Гэрээний хэрэгжилттэй холбоотой асуултыг салбарын сайдад тавиад тодорхой хариу авч чадаагүйдээ бухимдсан УИХ-ын гишүүн С.Эрдэнэ Засгийн газрыг шүүмжилж, «Монголчуудын хувь заяатай холбогдсон энэ том төсөлд Засгийн газар ач холбогдол өгөхгүй байна. Энэ ордоор Засгийн газар хангалттай бизнес хийлээ» гэж байв.