УИХ-ын гишүүн С.Эрдэнэтэй ярилцлаа.

УИХ-ын 25 дугаар тойрог буюу Баянгол дүүрэгт Ардчилсан намаас нэр дэвшигчид өчигдөр тус дүүргийн долдугаар хорооны иргэдтэй уулзалт хийсэн юм. Энэ үеэр тус дүүрэгт АН-аас нэр дэвшиж буй УИХ-ын гишүүн С.Эрдэнэтэй цөөн хором ярилцлаа.

-Та иргэд, сонгогчидтой уулзаж эхлээд нэлээд хэд хонолоо. Ер нь иргэд ямархуу асуудлыг хөндөж байна. Та бүхний зүгээс бас ямар ажил, амлалтуудыг хэрэгжүүлнэ гэж ярьж байгаа вэ?

-Бид хувь хүнийхээ хувьд ямар нэгэн амлалт дэвшүүлж ярихгүй байгаа. Ардчилсан намын мөрийн хөтөлбөр, Ардчилсан намын уриаг ярьж байна. Иргэдээс маш их санал, хүсэлтүүд ирж байна. Тэдэнд тулгамдаж байгаа асуудлуудын талаар санал бодлоо солилцож, өнгөрсөн хугацаанд хийсэн ажлынхаа тайлан, ирээдүйд хийх ажлынхаа асуудлаар голдуу ярьж байна.

-Тэгвэл Ардчилсан намаас энэ удаагийн сонгуульд дэвшүүлж байгаа мөрийн хөтөлбөрийн талаар ярья. Гол давуу тал, онцлог нь юу вэ?

-Бид “Монгол хүн” гэсэн мөрийн хөтөлбөр дэвшүүлсэн. Ер нь өнөөдөр хүн шиг амьдаръя, улс шиг хөгжье гэж байгаа. Энгийн юм шиг мөртлөө их өргөн агуулгатай уриалга. Энэ уриалгаа тойроод, монгол хүн хүн шиг амьдарч чадаж байна уу, үгүй юу. Монгол хүнийг хүн шиг амьдруулахын тулд яг ямар нөхцлүүдийг бүрдүүлэх ёстой вэ. Тэр талаар л ярьж байна.

-Өнөөдөр тэгвэл монгол хүн хүн шиг амьдрах нөхцлийг бүрдүүлэхийн тулд хамгийн түрүүнд ямар асуудлыг шийдвэрлэх вэ?

-Өнөөдөр эрүүл монгол хүн, ажил орлоготой, аюулгүй, амгалан тайван амьдрах ёстой. Ер нь монгол хүн хүн шиг амьдрахын тулд хүний амьдралын наад захын хэрэгцээ шаардлага юу байна вэ. Тэр нөхцлүүдийг бүрдүүлэх шаардлага байгаа. Тийм учраас тэр бүх талын ажлуудыг ярьж байгаа. Ардчилсан намаас дэвшүүлж буй “Таван А“ хөтөлбөрт Монгол хүнийг хүн шиг амьдруулахын тулд яг юу хийх ёстой вэ гэдгийг тодорхойлчихсон байгаа. Энэ бол манай намын мөрийн хөтөлбөрийн гол утга санаа нь юм.

-Баянголчуудын төвшинд тэгвэл асуудал ямархуу байна вэ, нэн түрүүнд шийдвэрлэх ёстой асуудлыг хэрхэн харж байна?

-Ер нь Ардчилсан намын мөрийн хөтөлбөрт бүх асуудал багтчихсан. Хаана хүн амьдарч байна, тэнд хүн шиг амьдрах орчин бүрдсэн байх ёстой. Аюулгүй амгалан тайван, ажил орлоготой амьдрах орчин бас бүрдсэн байх ёстой. Эрдэм боловсролтой монгол хүмүүсийг бий болгох ёстой. Энэ бүх зорилтууд манай дүүрэгт ч бас тусгалаа олж, биелэгдэх ёстой гэж бодож байна.

-Намууд янз бүрийн мөрийн хөтөлбөр дэвшүүлдэг л дээ. Гэхдээ хэрэгжүүлэх боломжтой юу, үгүй юу гэх асуудал бас хөндөгддөг. Танай намын мөрийн хөтөлбөрийн хувьд?

-Ер нь бол Ардчилсан намын урд өмнө нь ч дэвшүүлж байсан мөрийн хөтөлбөрүүд дандаа амьдралаас урган гарсан байдаг. Амьдралд хэрэгжих боломжтой мөрийн хөтөлбөр, уриаг дэвшүүлж байсан. Энэ удаад ч гэсэн бид яг л амьдралаас урган гарсан ард иргэдээрээ хэлэлцүүлсэн мөрийн хөтөлбөрийг дэвшүүлсэн. “Монгол хүн-2020” хөтөлбөрийн хүрээнд хоёр жил гаран монгол орныг тойрон аялж, олон мянган иргэдийнхээ санал, сэтгэгдлийг сонссон. Энэ бүхэн дээр тулгуурлаж, мөрийн хөтөлбөр боловсруулагдсан. Тийм учраас хэрэгжих бүрэн боломжтой мөрийн хөтөлбөр.

-Ярилцлагынхаа төгсгөлд таньд манай сониноор дамжуулан иргэд, сонгогчиддоо хандсан үг хэлэх боломжийг нээлттэй үлдээе?

-“Хүн шиг амьдаръя, Улс шиг хөгжье”, “Монгол хүн” гэсэн хөтөлбөрийг дэмжээрэй. Энэ бол та бүхний санаа, оноог тусгасан хөтөлбөр шүү. Тийм учраас та бид хамтарч байж энэ хөтөлбөрийг хэрэгжүүлнэ. Тэгж байж, улс орноо хөгжүүлнэ. Тэгэхээр Ардчилсан намаас дэвшүүлсэн мөрийн хөтөлбөрийг дэмжээрэй, Ардчилсан намыг дэмжээрэй. Ардчилсан намаас нэр дэвшигчдийг дэмжээрэй л гэж хэлье.

С.Эрдэнэ: Хаана хүн амьдарч байна, тэнд хүн шиг амьдрах нөхцөл бүрдэх ёстой