УИХ-ын чуулганы өнөөдрийн /2020.01.24/ үдээс хойшхи хуралдааны эхэнд УИХ-ын гишүүн Н.Амарзаяагаас Монгол Улсын Ерөнхий сайдад хандан “Монгол Улсын усны нөөц, ус ашиглалт болон уг салбарт баримталж буй бодлогын талаар” тавьсан асуулгын хариуг сонслоо. 

Асуулгын хариуг Байгаль орчин, Аялал жуулчлалын сайд Н.Цэрэнбат танилцуулсаны дараа гишүүн Н.Амарзаяа байр суурриа илэрхийллээ. 

УИХ-ын гишүүн Н.Амарзаяа:

"Миний тавьсан санал асуулгын зорилго бол Ус нь аливаа үнэт эрдэнэсээр орлуулах боломжгүй зүйл юм. Энэ тал дээр Монгол Улсын төр, Засгийн газрын зүгээс ямар бодлого баримталж байгаа болон ямар үйл ажиллагаа хэрэгжүүлэн, төсвийн хөрөнгө хэрхэн дэмжигдэж байгааг агуулсан. Урт дунд богино хугацаанд ашиглалт болон гүний усыг хэрхэн ашиглаж байгаа тухай, уул уурхайн салбарт усыг хэрхэн ашиглаж байгаа усны төлбөр дэлхийн түвшинд нийцэж байгаа эсэх талаар тодорхой тайлбар авах зорилготой байсан.

Өнгөрсөн 7 хоногт Усны асуудал хариуцсан бие даасан агентлаг байгуулагдахаар боллоо. Энэ үеэр миний тавьсан асуулгын агуулга нилээд хэлэлцүүлэгдсэн. Одоо усны нөөц ашиглалт болон аюулгүй байдал тал дээр анхаарал хандуулж ажиллах ёстой. Хамгийн гол нь Монгол Улс өөрөө усны засаглалаа бэхжүүлэх, одоо мөрдөгдөж байгаа усны хяналтын үйл ажиллагааг сайжруулах хэрэгтэй. Монгол Улсын хэмжээнд усны нөөцийн 265 мониторингийн цэг ажиллаж байна. Тэдний 210 нь хагас автомат гэж байна. Үүнийгээ төсвийн хөрөнгө гаргаад бүрэн автомат болгох шаардлагатай байх. 

УИХ-ын тамгын газар хяналт шинжилгээний албатай. Гишүүдийн асуулгын хариу бүрэн хариу ирж байгаа эсэхэд анхаарч ажиллах, сайжруулах шаардлага байна. ийм тогтолцоо орхигдоод байна.

Усны асуудалд манай улс аудит хийх шаардлага байна. Нөөцийн хяналт болон ашиглалтаа хянах дэвшилтэт технологи дэлхийн олон оронд байгаа. Үүнийг хөдөө орон нутаг төдийгүй уул уурхайн салбарт нэвтрүүлэх шаардлага байна. 

Гүний усны судалгаа шинжилгээний төвийг байгуулах асуудлыг 2019 онд улсын төсвийн хөрөнгөөр ТЭЗҮ-ийг хийх ажилд дуусч байгаа. Үүнийг яам татаж аваад энэ чиглэлээр хэрэгжих төсөл байгаа бол говийн бүсэд үүнийг байгуулах хэрэгтэй.

Гадаргын саарал усыг уул уурхайн салбарт ашиглах чиглэлд ихээхэн анхаарч ажиллах шаардлага байна. Одоогоор Өмнөговь аймагт ажиллаж байгаа олон уурхайдад нүүрс угаах үйлдвэр барьсан нь тухайн бүс нутагтаа хангалттай. Цаашид нэмж нүүрс угаах үйлдвэр байгуулах шаардлагагүй гэж үзэж байна. Тиймээс бодлогын байгууллагууд уялдааг хангаж ажиллах хэрэгтэй байна."